प्रादेशिक सञ्चार प्रतिष्ठानका कार्यकारी निर्देशक शर्मालाई नहटाउन माग गरिएको रिट खारेज

विराटनगर -  मुख्यमन्त्री राजेन्द्रकुमार राई नेतृत्वको वर्तमान सरकारले खारेज गरेको प्रदेश १ को प्रादेशिक सञ्चार प्रतिष्ठानका कार्यकारी निर्देशक यज्ञ शर्मालाई हटाउने निर्णयविरुद्धको रिट उच्च अदालत विराटनगरले खारेज गरिदिएको छ । मुख्य न्यायाधीश तीलप्रसाद श्रेष्ठ र न्यायाधीश मुरारीबाबु श्रेष्ठको संयुक्त इजलासले मंगलबार रिट निवेदन खारेज गरेको जनाइएको छ । 

प्रदेश १ सरकारको मंसिर ९ गतेको मन्त्रिपरिषद् बैठकले प्रादेशिक सञ्चार प्रतिष्ठान र कार्यकारी निर्देशक शर्माको पदसमेत खारेज गरेको गर्ने निर्णय गरेको थियो । राजनीतिक उदेश्यका लागि मात्रै पदबाट हटाएको भन्दै कार्यकारी निर्देशक शर्माले सरकारको निर्णय विरुद्ध उच्च अदालत विराटनगरमा सरकारविरुद्ध अन्तरिम आदेशको माग गर्दै रिट निवेदन दायर गरेका थिए । 

---

पुस १४ मा उच्च अदालत विराटनगरले सरकारका नाममा अन्तरिम आदेश दिंदै शर्मालाई कार्यकारी निर्देशकका रुपमा काम गर्न नरोक्नु भनि आदेश दिएको थियो । त्यहि आदेशलाई निरन्तरता दिंदै पुस २५ मा भएको पेशीमा पनि उच्च अदालतले प्रदेश १ सरकारको मन्त्रिपरिषद्को सक्कल निर्णय झिकाउन सरकारलाई आदेश दिएको थियो । 

सरकारको निर्णयको आधारमा उच्च अदालतले प्रादेशिक संचार प्रतिष्ठानको कार्यकारी निर्देशक पदबाट नहटाउने मागमा दाबी नपुग्ने भन्दै रिट खारेज गरिदिएको हो । रिट खारेज भएसँगै कार्यकारी निर्देशक पद स्वतः खारेज भएको छ ।