प्रतिनिधिसभा विघटनविरुध्दको रिटमाथि आजबाट सुनुवाइ हुँदै

काठमाडौं : प्रतिनिधिसभा विघटनविरुध्द परेका रिटहरूको सुनुवाइ बुधबारदेखि संवैधानिक इजलासमा हुँदैछ । प्रधानन्यायाधीश चोलेन्द्र शम्शेर जबराको नेतृत्वमा गठित इजलासमा न्यायाधीशहरू हरिकृष्ण कार्की, विश्वम्भरप्रसाद श्रेष्ठ, अनिलकुमार सिन्हा र तेजबहादुर केसी छन् । पाँच सदस्यीय संवैधानिक इजलासमा रिट निवेदनहरूमाथि सुनुवाइ गर्नेगरी पेशी तोकिएको हो ।

सर्वोच्चले यी निवेदनहरूमा सुनुवाई गर्ने छ । उक्त इजलासमा १३ वटा निवेदनहरुको नियमित सुनुवाइ हुने योजना छ । इजलासमा यसअघि  पुस १० गतेको इजलासमै भएका न्यायाधीशहरू छन् ।

---

प्रधानमन्त्री केपी शर्मा ओलीले पुस ५ गते प्रतिनिधिसभा भंग गरी आगामी बैशाख १७ र २७ गते मध्यावधि निर्वाचन गर्न राष्ट्रपति विद्यादेवी भण्डारीलाई सिफारिस गरेका थिए । राष्ट्रपति भण्डारीले सोही दिन ओलीको सिफारिस सदर गरेकी थिइन् ।

राष्ट्रपति भण्डारी र प्रधानमन्त्री ओलीविरुध्द रिट दायर गर्नेहरुमा वरिष्ठ अधिवक्ता दिनेश त्रिपाठी, कन्चनकृष्ण न्यौपाने, लोकेन्द्रबहादुर ओलीलगायत छन् । पुस ७ गते नेकपाका सांसदहरु देव गुरुङ, कृष्णभक्त पोखरेल, शशी श्रेष्ठ र रामकुमारी झाँक्रीले पनि संसद विघटनविरुद्ध सर्वोच्चमा रिट दायर गरेका थिए ।