नेकपामा विवाद विधि र पध्दति मान्‍ने र नमान्‍नेबीच विवाद देखियो : पुन

दाङ : नेकपा (दाहाल-नेपाल समूह)का स्थायी समिति सदस्य वर्षमान पुनले पुष्पकमल दाहाल र माधवकुमार नेपालले ओली प्रवृत्ति सुधार्न खोज्दा नेकपा विभाजन भएको बताएका छन् ।
 
दाङको तुलसीपुरमा शनिबार आयोजित अगुवा कार्यकर्ता भेलामा पुनले नेकपा विवाद अमुक नेताहरूबीच पदीय भागबण्डा वा सुख सुविधा प्राप्तिको झगडा नभइ विचार, सिध्दान्त, विधि र पध्दति मान्‍ने र नमान्‍नेबीचको लडाईं भएको बताए । 

प्रधानमन्त्री केपी शर्मा ओली समूहले गत जेठमै प्रतिनिधि सभा विघटनको तयारी गरेपछि दाहालले संसद्को पाँच वर्षे कार्यकाल मध्ये आधा-आधा अवधि सरकारको नेतृत्व गर्ने लिखित सहमतिबाट पछि हटेर जिम्मेवारीपूर्वक पाँचै वर्ष प्रधानमन्त्री खान दिने प्रतिबध्दता जनाएको दाबी पुनले गरे । 

---

‘ओली गुटले केही नेताहरूको मान मर्यादा र पदका लागि पार्टीभित्र विवाद झिकिएको भ्रम फैलाउने कोसिस गरेको छ’ पुनले भने, ‘पदावधिका आधारमा आधा आधा कार्यकाल सरकार सञ्चालन गर्ने सहमति पनि गरेका थियौं । तर,  केपी ओलीले विचार, सिध्दान्त, विधि र पध्दतिका लागि भएको लडाईंलाई ओली-दाहालको लडाई, ओली-नेपालबीचको लडाईं भन्‍ने जस्तो बनाएपछि दाहालले तपाईं नै पाँच वर्षका लागि प्रधानमन्त्री हुनुस् । पार्टी अध्यक्ष पनि तपाईं नै हुनुस् । कार्यकारी अधिकार मलाई दिनुस् म पार्टी अगाडि बढाउँछु भन्‍ने प्रस्ताव गर्नुभयो ।’

पुनले ओलीले जनतामा गरेका प्रतिबध्दता र बाचामाथि विश्‍वासघात गरेको भन्दै ओलीसँग आफूहरूको जिम्मेवारी र विचारको लडाईं रहेको उल्लेख गरे ।