खतिवडाविरुद्ध उजुरी गर्ने व्यक्ति ‘गायब’

काठमाडौं : पूर्व अर्थमन्त्री डा. युवराज खतिवडाविरुद्ध संसदीय समितिमा उजुरी गर्ने व्यक्ति समितिमा अनुपस्थित भएका छन् । प्रस्तावित राजदूतका विषयमा छलफल गर्न सोमबार बोलाइएको संसदीय सुनुवाई समितिमा उजुरीकर्ता उपस्थित भएनन् ।

उजुरी कर्ता नै समितिको सम्पर्कमा नआएपछि संसदीय सुनुवाईको प्रकृया अगाडि बढेको सभापति लक्ष्मणलाल कर्ण जानकारी दिए । उनका अनुसार प्रस्तावित राजदूत खतिवडा लगायतको सुनुवाइ कात्तिक २७ गते गर्ने निर्णय समितिले गरेको छ । सरकारले डा.खतिवडालाई अमेरिकाको राजदूतका लागि प्रस्ताव गरेको थियो । उक्त प्रस्ताव संसदको संसदीय सुनुवाई समितिमा पुगेपछि समितिले दश दिनको म्याद राख्दै असोज २१ मा उजुरी गर्न आह्वान भएको थियो ।

---

समितिको उजुरी आह्वानपछि खतिवडाविरुद्ध तीनवटा उजुरी परेका थिए । समितिले कार्तिक ३ गते प्रस्तावित राजदूतविरुद्ध परेका उजुरीहरुमाथि अध्ययन थालेको थियो । समितिले उजुरी कर्तालाई सम्पर्क गरेर थप प्रमाण माग्ने प्रयास गरेपछि उजुरीकर्ता संसदीय समितिको सम्पर्कमा आएनन् । कार्तिकको पहिलो हप्ता समितिले उजुरीकर्तालाई थप प्रमाणसहित १७ गते उपस्थित हुन आग्रह गरेको थियो ।

त्यस्तै बेलायतका लागि प्रस्तावित राजदूत पूर्व मुख्यसचिव लोकदर्शन रेग्मीविरुद्ध पनि समितिमा एउटा उजुरी परेको थियो । उनी विरुद्ध उजुरी गर्ने उजुरी कर्ता पनि संसदीय समितिको सम्पर्कमा आएनन् ।