११ महिनापछि केपी ओली पार्टी कार्यालयमा

काठमाडौँ  : केपी शर्मा ओली अहिले जुन कुर्सीमा आसिन छन् त्यसको सम्पूर्ण श्रेय पार्टी हो । पार्टीका कार्यकर्ता हुन् । ती कार्यकर्तालाई परिचालित गर्ने काम धुम्बाराहीस्थित नेकपा एमालेको मुख्यालयबाट हुन्छ । पार्टी नेतृत्वकर्ताको हैसियतले त्यहीँबाट ओलीले नेता कार्यकर्ता परिचालित गर्नुपर्ने हो । तर, त्यही पार्टीका अध्यक्ष ओली बल्ल-तल्ल ११ महिनापछि पार्टी कार्यालयमा झुल्किए । त्यो पनि पार्टीका वरिष्ठ नेता माधवकुमार नेपाल समूहको जोडबलका कारण । ओली पछिल्लो पटक गत वर्षको चैत पहिलो हप्तामा पार्टी कार्यालय गएका थिए ।

पार्टीमा एकलौटी निर्णय गरेर झलनाथ खनाल-माधव नेपाल समूहलाई हस्तक्षेप गरेका ओली सोमबार पार्टी कार्यालयमा पुगेका हुन् ।  ‘बालुवाटारमा छलफल गर्ने भनेर खबर आयो,’ माधव नेपाल समूहका नेता तथा एमालेका केन्द्रीय सदस्य विष्णु रिजालले भने, ‘बालुवाटारमा हुँदैन पार्टी कार्यालयमै छलफल गरौँ भनेपछि उहाँ बालुवाटार आउनु भएको हो ।’ 

---

बल्ल तल्ल पार्टी कार्यालय गएका ओलीले आधा घण्टा माधव नेपाल पक्षका नेताहरुलाई कुराइदिए । निर्धारित ११ बजे नै नेपाल कार्यालय पुगेका थिए भने ओली त्यसको आधा घण्टापछि मात्रै । 

त्यस अघि ओली माओवादी केन्द्र र एमाले मिलेर बनेको नेकपाको अध्यक्ष हुँदा आलोपालो बैठक गर्नेक्रममा धुम्बाराही पुगेका थिए । एमाले केन्द्रीय कार्यालयका सचिव ईश्‍वरी रिजालले पनि लामो समयपछि ओली पार्टी कार्यालय आएको स्वीकारे । ‘आज छलफलका लागि लामो समयपछि आउनु भयो,’ रिजालले भने, ‘पहिले उहाँ आफ्नै च्याम्बर या तलको हलमा छलफलका लागि बस्‍नुहुन्थ्यो । आज म कार्यालय सचिव भएर आएपछि बनाएको माथिको नयाँ हलमा बस्‍नु भयो । नेताहरुसँग त्यहीँ छलफल गरेर फर्कनु भयो ।’ 

रिजालले ओली अघिल्लो वर्ष कार्यालय गएको बेला र अहिले कार्यालयको भौतिक संरचनाको स्वरुपहरु परिवर्तन भएको पनि बताए । ११ महिनापछि कार्यालय पुगेर ओलीले आफ्नै पार्टीका नेताहरुसँग छलफल गरे । छलफल भने सकरात्मक रुपमा टुंगिएन । 

माधव नेपाल पक्षले गत फागुन २८ गते ओलीले एकलौटी गरेका निर्णय खारेज गर्न माग गरेपछि ओलीले त्यसलाई ठाडै अस्वीकार गरे । वरिष्ठ नेता नेपालले त ओलीसँगको छलफल अन्तिममा टर्रो भएको प्रतिक्रिया दिए । ‘छलफलको सुरुवात राम्रो भयो । छुट्टिने बेलामा टर्रो कुरा भयो’ बैठकपछि नेपालले भने ।  

ओली पक्षले पनि नेपाल समूहले चैत ४-५ गते आह्वान गरेको राष्ट्रिय भेला रोक्नुपर्ने कुरा उठायो । तर, नेपाल पक्षले पनि ओली पक्षको आग्रह स्वीकार गरेन । उल्टै धुम्बाराहीबाट निस्किएको नेपाल समूहले बानेश्वारमा आएर अर्याल होटलमा आफ्नो पक्षको भेला गर्‍यो । उक्त भेलामा नेता नेपालले ओलीसँग भएको छलफलबारे ब्रिफिङ गरे । त्यस्तै सोही भेलाले चैत ४-५ गते आह्वान गरेको भेला नरोक्ने र ओलीले मंगलबार प्रधानमन्त्रीको सरकारी निवास बालुवाटारमा गर्ने चियापान कार्यक्रममा पनि नजाने निर्णय गरेको छ ।