भरतपुरमा जुटेन सहमति, बागी उम्मेदवारकै घरमा गएर मनाउन अन्तिम प्रयास गर्ने

काठमाडौँ – चितवन जिल्ला कांग्रेस समितिको बैठकले स्वतन्त्र रुपमा उम्मेदवार दर्ता गराएकालाई उम्मेदवारी फिर्ता लिन लगाउने निर्णय गरेको छ । बुधबार कांग्रेस केन्द्रीय सदस्य तथा गृहमन्त्री बालकृष्ण खाँडको प्रमुख आतिथ्य र जिल्ला सभापति राजेश्वर खनालको उपस्थितिमा बैठक बसेको थियो ।

'पार्टीको भर्खर बैठक सकिएको छ,' उनले भने,' स्वतन्त्र रुपमा उम्मेदवार दर्ता गराएकाहरूसँग उनीहरूकै घरमा बेलुका छलफल हुन्छ ।'

---

बालुवाटारमा आजै सत्ता गठबन्धनको बैठक बसेर आफ्ना दलबाट बागी उठेका उम्मेदवारलाई आफ्नो उम्मेदवारी फिर्ता लिन लगाउने निर्णय भएको थियो । उक्त निर्णय भएसँगै खाँण बागी उम्मेदवारलाई सम्झाउन चितवन पुगेका थिए । 

सत्ता गठबन्धनको भागबण्डामा भरतपुरको मेयर माओवादी केन्द्रले पाएको थियो। माओवादीको तर्फबाट रेणु दाहालले उम्मेदवारी दिइसकेकी छिन् । तर, गठबन्धनकै दल कांग्रेसबाट नेता एवं पूर्वसांसद जगन्नाथ पौडेलले सोमबार बागी उम्मेदवारी दर्ता गराएका थिए ।