शक्तिशाली छौं भनेर दम्भ नगर्नुस्, ओलीकै हालत होला : अध्यक्ष नेपाल

पोखरा- नेकपा एकीकृत समाजवादीका अध्यक्ष माधव कुमार नेपालले धेरै शक्तिशाली छौँ भन्ने दम्भ नराख्न गठबन्धनका नेताहरूलाई चेतावनी दिएका छन् । सत्ता गठबन्धनले आइतबार पोखरामा आयोजना गरेको चुनावी सभालाई सम्बोधन शक्तिशाली छौँ भन्ने दम्भ राखे एमाले अध्यक्ष केपी शर्मा ओलीको जस्तै विनाश हुने बताए ।

‘कहिलेकाहीँ कम्युनिस्टमा दम्भ हुन्छ हामी शक्तिशाली छौँ भन्ने अनि कांग्रेसमा पनि दम्भ हुन्छ हामी धेरै शक्तिशाली छौँ,’ उनले भने, ‘यस्तै दम्भ राख्नुभयो भने तपाईंहरूको पनि विनाश हुन्छ, केपी ओलीकोजस्तै ।’ उनले एमाले अध्यक्ष केपी ओली व्यक्तिवादी भएको आरोप लगाएका छन् । ओलीले आफूबाहेक अरु कसैलाई पनि दुई कौडीको महत्व नदिने बताए ।

---

‘ओली व्यक्तिवादी व्यक्ति हुन् । उनले आफूबाहेक अरु कसैलाई पनि दुई कौडीको महत्त्व दिँदैनन्,’ नेपालले भने, ‘अपमान गर्दै हिँड्छन् । कुसंस्कार बोकेर हिँडेका छन् ।’ त्यसैकारण पनि गठबन्धन आवश्यक रहेको उनको धारणा थियो ।