लोसपालाई पञ्चर भन्ने कांग्रेसको दिमाग नै पञ्चर छ : नेता भण्डारी

जनकपुरधाम – लोकतान्त्रिक समाजवादी पार्टी (लोसपा) नेपालका वरिष्ठ नेता शरत सिंह भण्डारीले लोसपाको साइकललाई पञ्चर भन्ने कांग्रेसको दिमाग नै पञ्चर रहेको कटाक्ष गरेका छन्। 

सोमबार जनकपुरधाममा लोसपाको आयोजित चुनावी सभालाई सम्बोधन गर्दै नेता भण्डारीले भने, 'जसलाई आफ्नो खुट्टामा उभ्न सक्ने क्षमता छैन कांग्रेसले हामीलाई पञ्चर भनिरहेका छन, हामी पञ्चर छैनौ, ती कांग्रेसको दिमाग नै पञ्चर छ।' 

---

उनले थप्दै भने, 'कांग्रेस त यस्ता पार्टी हुन जो माओवादी र एकीकृत समाजवादीको कांधमा बसेर कथित मधेशिया दल जसपाको धक्काले चलिरहेका छन । आफ्नो खुट्टामा हिंडन नसक्ने भएका पार्टीले अरुलाई पञ्चर भन्छन यो कस्तो हस्यापद कुरा हो ।'

नेता भण्डारीले स्थानीय तह निर्वाचन आफ्नो नेतृत्व प्रदर्शन र पहिचान स्थापित गर्न सक्ने राजनीतिक शक्ति हो, तर कांग्रेसले आफ्ना नेता कार्यकर्ताहरुलाई ती प्रक्रियाको अवसरबाट वञ्चित गराएर अरुको सहारा लिन गठबन्धन बनाएकाे बताए ।

उनले भने, 'कांग्रेसले आफ्नो हैसियत यही स्थानीय तहको निर्वाचनमा देखाइ सक्यो जसले आफू एक्लै लड्न सक्ने क्षमता नभएको कारण माओवादी, एकीकृत समाजवादी र जसपाको कांधमा हिंडन खोजेको छ । तर मधेशी जनता अब सचेत भइसकेका छन, त्यस्ता पाखण्डी गठबन्धन दलको हैसियत देखाइदिनेछ।'