जिसस मोरङमा एमालेको प्यानलै निर्वाचित

विराटनगर - जिल्ला समन्वय समिति (जिसस) मोरङमा नेकपा एमालेका प्रमुख र उपप्रमुखसहित उम्मेदवारहरू प्यानलै निर्वाचित भएका छन् । मंगलबार सम्पन्न निर्वाचनबाट प्रमुखमा एमालेका अजम्बर राई र उपप्रमुखमा उषा झा निर्वाचित भएको मुख्य निर्वाचन अधिकृत भरत लम्सालले जानकारी दिए ।

प्रमुखमा निर्वाचित राईले २१ र उपप्रमुख झाले २१ मत प्राप्त गर्दै निर्वाचित भएका हुन् । सदस्यहरूमा पनि एमालेकै तुलसी प्रसाद घिमिरे, देवमणी कटुवाल, मित्र प्रसाद ढकाल, उमा नेपाली, उर्वशी कुमारी थारु र हरि माया विश्वकर्मा निर्वाचित भएको जनाइएको छ ।

---

मोरङका १७ वटा स्थानीय तहमा एमालेबाट ९ जना प्रमुख र १२ जना उपप्रमुख निर्वाचित भएका थिए । कुल २१ मत रहेको एमालेका दुईजना सदस्यहरुलाई कांग्रेसको समेत मत प्राप्त भएको छ । कांग्रेसका ८ प्रमुख र ४ उपप्रमुख निर्वाचित भएका थिए । मोरङले माओवादी केन्द्रले एउटा पालिकाको उपप्रमुख जितेको थियो ।

एमालेबाट सदस्यमा निर्वाचित उमा नेपालीले २३ मत प्राप्त गरिन् । त्यसैगरी सदस्यमा मित्र प्रसाद ढकालले २२ मत प्राप्त गरेका हुन् । एमालेबाट सदस्यमा निर्वाचित नेपाली र ढकालको मत बढि आउँदा कांग्रेसका उम्मेदवारको मत भने घटेको छ । जिल्ला समन्वय समितिको निर्वाचनमा स्थानीय तहका निर्वाचित प्रमुख र उपप्रमुखले मतदान गर्ने व्यवस्था छ ।

नेपाली कांग्रेसबाट समन्वय समितिको प्रमुखमा जितेन्द्र अग्रवाल र उपप्रमुखमा निलम कुमारी सरदारलाई उठाएको थियो । उनीहरुले माओवादी केन्द्रका एक भोटसहित कुल १३÷१३ मत प्राप्त गरेका थिए ।