कोभिड-१९ बाट प्रदेश १ मा २४७ को मृत्यु

विराटनगर : प्रदेश १ मा कोभिड-१९ को संक्रमणबाट मृत्यु हुनेको संख्या दुई सय ४७ पुगेको छ । विराटनगरमा सोमबार बिहान उपचाररत थप तीन जनाको मृत्यु भएसंगै प्रदेश १ मा काभिडका कारण मृत्यु हुनेको संख्या त्यति पुगेको हो । आइतबार मात्र प्रदेश १ मा थप ७ जनाको मृत्यु भएको थियो । 

बिहान उदयपुरको त्रियुगा नगरपालिका-११ की ६५ वर्षीया वृध्दा महिलाको मोरङको बूढीगंगास्थित विराट शिक्षण अस्पतालमा मृत्यु भएको हो । यसैगरी झापाको दमक नगरपालिका-१ का ४२ वर्षीय पुरुषको पनि विराट नर्सिङ होममा बिहानै मृत्यु भएको छ । कोरोना पुष्टि भएपछि कात्तिक ९ गते अस्पताल भर्ना गरिएका उनको उपचारको क्रममा मृत्यु भएको अस्पतालले जनाएको छ ।

---

प्रदेश १ मा आइतबारसम्म २१ हजार २ सय ५० जनामा संक्रमण पुष्टि भएको छ । ७ हजार १ सय ९४ जना आइसोलेसनमा रहेको सामाजिक विकास मन्त्रालयले जनाएको छ । यसैगरी १३ हजार ८ सय ५७ जना संक्रमण जितेका छन् । प्रदेश बाहिर स्थायी ठेगना भएका २० जनाको मृत्यु प्रदेश १ मा उपचारका क्रममा भएको मन्त्रालयले जनाएको छ ।

प्रदेशका १४ वटै जिल्लामा कोरोना संक्रमित छन् । संखुवासभा, खोटाङ, भोजपुर, पाँचथर, ओखलढुंगा र सोलुखुम्बुमा अहिलेसम्म संक्रमणबाट ज्यान गएको छैन । प्रदेश प्रयोगशाला, कोशी अस्पताल विराटनगर, नोवेल मेडिकल कलेज, विराट मेडिकल कलेज, न्युरो अस्पताल, धरान स्थित वीपी कोइराला स्वास्थ्य विज्ञान प्रतिष्ठान, ‘बी स्योर’  विराटनगर र मेची अस्पताल, कनकाइ पीसीआर प्रयोगशाला झापाले निययमित रुपमा पीसीआर परीक्षण गर्ने गरेका छन् ।