मोरङमा पुँजीगत खर्च ८५ प्रतिशत

विराटनगर- आर्थिक वर्ष २०७८/७९ मा मुलुकको कूल पुँजीगत खर्च ५७ प्रतिशतमात्रै रहँदा मोरङ जिल्लाको पुँजीगत खर्च भने ८५ प्रतिशत भएको छ ।

पुँजीगततर्फ ६ अर्ब ४९ करोड रुपैयाँ बजेट विनियोजन भएकोमा ५ अर्ब ५१ करोड रुपैयाँ खर्च भएको कोष तथा लेखा नियन्त्रक कार्यालय  विराटनगरले जनाएको छ । पुँजीगत खर्चमध्ये असार महिनाको खर्च भने ३३ प्रतिशत अर्थात १ अर्ब ८४ करोड रुपैयाँ रहेको छ ।

---

संघीय सरकारले मोरङ जिल्लाका लागि वार्षिक बजेट अन्तर्गत चालू र पुँजीगत गरी ४२ अर्ब ५९ करोड रुपैयाँ विनियोजन गरेको थियो । जसको ९६ प्रतिशत अर्थात ४० अर्ब ९२ करोड रुपैयाँ खर्च भएको कोलेनिका विराटनगरका प्रमुख कोष नियन्त्रक किशोरकुमार बरालले बताए । चालूतर्फ ३६ अर्ब ९ करोड बजेट मध्ये ३५ अर्ब ४१ करोड खर्च भएको उनले जानकारी दिए ।

चालू खर्च मध्ये प्रदेश १ मा संघीय सरकारबाट शसर्त, पुँजीगत, विशेष र समपूरक अनुदानतर्फ कूल १८ अर्ब प्राप्त भएकोमा १७ वटा स्थानीय तहलाई ९ अर्ब रुपैयाँ हस्तान्तरण भएको छ । चालू खर्च अन्तर्गत नै सामाजिक सुरक्षा भत्तातर्फ ३ अर्ब ३२ करोड ३५ लाख रुपैयाँ खर्च भएको प्रमुख कोष नियन्त्रक बरालले बताए । 

आव २०७८/७९ मा मोरङमा ५२ अर्ब ४१ करोड रुपैयाँ राजस्‍व संकलन भएको हो । जसमध्ये विराटनगर भन्सारले ४० अर्ब ४२ करोड र आन्तरिक राजस्‍व कार्यालय विराटनगरले ८ अर्ब २४ करोड रुपैयाँ राजस्‍व संकलन गरेको जनाइएको छ ।