चर्को ब्‍याजदरविरुद्ध व्यवसायीको आन्दोलन : 'ब्‍याजदर साह्रो भो, गरिखान गाह्रो भो'

विराटनगर- चर्को ब्याजदरको विरोधमा उत्रिएका मोरङ–सुनसरी औद्योगिक क्षेत्रका उद्योगी व्यवसायीले नेपाल राष्ट्र बैंकको विराटनगरस्थित प्रादेशिक कार्यालय अगाडि धर्ना दिएका छन् । उद्योग व्यवसायसम्वद्ध संघसंस्थाहरूले बिहीबारदेखि अनिश्चितकालिन धर्ना सुरु गरेका हुन् ।

---

बैंकहरूको मात्रै नाफा सुरक्षित हुने गरी राष्ट्र बैंकले संरक्षण गरेको भन्दै उनीहरूले आन्दोलनको घोषणा गरेको बताएका छन् । औद्योगिक व्यवसायिक संघसंगठनसहित करिब ४५ वटा संघसंस्थाहरूका प्रतिनिधिहरू धर्नामा सहभागी भएका छन् । सरकारलाई जतिसुकै घचघच्याउँदा पनि समस्याको सुनुवाई नभएको आरोप लगाएका छन् ।

उद्योगी व्यवसायीहरूले चालु पूँजी कर्जा निर्देशिकाको खारेजी, एकल अंकको बैंक ब्याजदर, स्प्रेड दर अधिकतम् २ प्रतिशत, संस्थागत ब्याजदर २ प्रतिशत र बैंकर र व्यवसायी अलग हुनुपर्ने माग राखेका छन् । उद्योगी व्यवसायीहरूको धर्नाका कारण अन्य बैंक तथा वित्तीय संस्थाहरूले राष्ट्र बैंकमा नगद लिन जान पाएका छैनन् । कर्मचारीहरूलाई कार्यालयमा प्रवेश गर्न दिइए पनि बैंकहरूबाट नगद लिन जाने गाडीहरूलाई उद्योगी व्यवसायीहरूले अवरोध गरेका छन् ।

बिहीबार सम्वद्ध संघसंस्थाहरूले संयुक्त रुपमा विज्ञप्ति जारी गरी निर्णायक आन्दोलनको घोषणा गरेको बताएका थिए । उनीहरूले विद्यमान चर्को बैंक ब्याजदर तथा प्रतिकूल बैंकिङ नीतिहरूका कारण आफुहरू पीडित बनेको भन्दै सवै क्षेत्रका सरोकारवालाहरूसँग छलफलपछि आन्दोलनमा उत्रिएको बताएका छन् ।