एमालेले प्रदेश १ मा आज दलको नेता छान्दै, कार्कीलाई सर्वसम्मत चयन गर्ने तयारी

विराटनगर- प्रदेश १ को प्रदेशसभाको सबैभन्दा ठुलो दल नेकपा एमालेले आज संसदीय दलको नेता चयन गर्ने भएको छ । ९३ सदस्यीय प्रदेशसभामा प्रत्यक्षतर्फ २५ र समानुपातिकबाट १५ गरी कुल ४० सांसद रहेको एमालेले दलको नेता चयन गर्ने मुख्य ऐजेण्डासहित अपरान्ह १ बजे बैठक बोलाएको हो ।

प्रदेशसभा सचिवालयस्थित संसदीय दलको कार्यालयमा बैठक तय भएको नवनिर्वाचित सांसद एवं एमालेका पूर्व प्रमुख सचेतक बुद्धिकुमार राजभण्डारीले जानकारी दिए । एमालेबाट संसदीय दलको नेतामा स्थायी कमिटी सदस्य रहेका पूर्व आन्तरिक मामिला तथा कानुनमन्त्री हिक्मतकुमार कार्की सर्वसम्मत चयन हुने एमाले स्रोतको दाबी छ । उनी झापा क्षेत्र नम्बर ५ (१) बाट दोस्रो पटक निर्वाचित भएका हुन् ।

---

प्रत्यक्षतर्फ निर्वाचन लडेका दुई महिला उम्मेदवार पराजित भएपछि एमालेले प्रदेश १ को प्रदेशसभामा समानुपातिकतर्फबाट १४ जना महिला सांसद प्रदेशसभामा पठाएको छ । एमालेसहित प्रदेश १ को प्रदेशसभामा प्रतिनिधित्व गर्ने ६ वटा दलबाट निर्वाचित सांसदहरू सोमबार हुने सपथ ग्रहण कार्यक्रममा सहभागी हुन आइतबार नै विराटनगर आइपुग्दैछन् । सपथ अगावै एमालेले दलको नेता गर्न लागेको हो ।

हालको गठबन्धन कायमै रहे कार्की नै प्रदेश १ को मुख्यमन्त्री बन्‍ने छन् । एमाले, राप्रपा र जसपा गठबन्धनमा ४७ सांसद रहेका छन् । प्रदेशसभाको बहुमत संख्या पनि ४७ नै हो । सत्ता गठबन्धनतर्फ नेपाली कांग्रेस, माओवादी केन्द्र, नेकपा (एस) का गरी ४६ सांसद मात्रै रहेका छन् ।