अपांगता भएकाहरू रोजगारी खोज्दै मेलामा

विराटनगर । रोजगारी र स्वरोजगारका अवसरमा अपागंता भएका व्यक्तिहरुलाई संरक्षित रुपमा समान मौका दिने उदेश्यले विराटनगरमा शुक्रबारदेखि दुई दिने रोजगार मेला सुरु भएको छ । मेलामा प्रदेश १ का १४ वटै जिल्लाबाट करिब तीनसय जना अपांगता भएका व्यक्तिहरु रोजगारीको उपयुक्त अवसर खोज्दै आइपुगेका छन् ।

अपांगता हुँदैमा केही पनि गर्न नसक्ने वा असक्षम नै हुने भन्ने धारणा विपरीत विभिन्न प्रकारका अपांगता भएका व्यक्तिहरु आफूलाई अनुकुल हुने खालका रोजगारीका अवसरका लागि मेलामा उपस्थित भएका हुन् । अपांगता भएर पनि अनुकुल वातावरण भएमा उनीहरुले आफ्नो सक्षमता प्रदर्शन गर्नसक्ने मान्यतालाई मूर्त रुप दिन मेला नेपाल उद्योग बाणिज्य महासंघ १ नम्बर प्रदेश समिति, करुणा फाउण्डेशन र द लेप्रोसी मिसन नेपाल र राष्ट्रिय अपांग महासंघको अगुवाईमा दुई दिने अपांगता समावेशी रोजगार मेला २०२२ विराटनगरमा आयोजना गरिएको हो ।

---

मेलामा रोजगारका अवसर प्रदान गर्ने उद्योग प्रतिष्ठान, कलकारखाना, कार्यालय तथा संघसंस्थाहरुको तर्फबाट ३४ वटा स्टल राखिएका छन् । ती स्टलहरुमा अपांगता भएका व्यक्तिहरुले आफ्नो क्षमता अनुसारको कामको अवसरका लागि सूचीकृत हुने मौका मेलाबाट प्राप्त गरेका हुन् । मेलाबारे जानकारी दिंदै नेपाल उद्योग बाणिज्य महासंघ प्रदेश १ का उपाध्यक्ष एवं केन्द्रीय सदस्य राजेन्द्र कुमार राउतले क्षमता र योग्यता प्रस्तुत गरि अपांगता भएका व्यक्तिहरुलाई पनि समाजमा आफ्नो पहिचान स्थापित गर्नका लागि अवसर प्रदान गरिएको बताए ।

उनले मेला आयोजना गरिएको मेलाका माध्यमबाट विशिष्कृत क्षमता भएका अपांगता भएका व्यक्तिहरुको रोजगारीको अवसरमा पहुँच सुनिश्चित भएको बताए । राउतले त्यसका माध्यमबाट राष्ट्रिय आय बृद्धिमा समेत योगदान पुग्नेमा आफूहरु विश्वस्त रहेको राउतले बताए । दुई दिने रोजगार मेलाको उद्घाटन गर्दै प्रदेश १ का मुख्यमन्त्री राजेन्द्र कुमार राईले निजी क्षेत्रको अग्रसरतामा अपांगता भएका व्यक्तिहरुको क्षमता र सीप विकासमा प्रभावकारी अवसर सिर्जना गर्न खोजिनु राज्यका लागि सराकात्मक कार्य भएको बताए ।