प्रदेश १ का मुख्यमन्त्री कार्कीले पाए विश्वासको मत

विराटनगर । प्रदेश १ का मुख्यमन्त्री हिक्मतकुमार कार्कीले शुक्रबार विश्वासको मत पाएका छन् । मुख्यमन्त्री नियुक्त भएको छैटौं तथा सपथको पाचौं दिन शुक्रबार कार्कीले प्रदेश सभाबाट विश्वासको मत पाएका हुन् ।

चार दलीय सत्ता समीकरणको समर्थनमा मुख्यमन्त्री बनेका कार्कीको पक्षमा ५९ मत प्राप्त भएको हो । कार्कीलाई नेकपा एमाले, नेकपा माओवादी केन्द्र, राप्रपा र जसपाको समर्थन रहेको थियो । संविधान २०७२ को धारा १६८ को उपधारा (२) बमोजिम नियुक्त भएका मुख्यमन्त्री कार्कीले संविधानको धारा १६८ को उपधारा (४) तथा प्रदेश सभा नियमावलीको नियम १२८ (१) र (२) बमोजिम विश्वासको मत प्राप्त गर्ने प्रयोजनका लागि प्रदेश सभामा प्रस्ताव दर्ता भएको थियो ।

---

९३ सदस्यीय प्रदेश सभामा मतदान गर्ने ९२ मध्ये विश्वासको मतको पक्षमा ५९ र विपक्षमा ३२ मत प्राप्त भएको सभामुख बाबुराम गौतमले घोषणा गरे । नेकपा एमाले संसदीय दलका नेता समेत रहेका कार्की एमालेका ४०, माओवादी केन्द्रका १३, राप्रपाका ६ र जसपाका एक गरी ६० जना प्रदेश सभा सदस्यीयको समर्थनमा मुख्यमन्त्री बनेका हुन् । माओवादीका सभा सदस्य बाबुराम गौतम सभामुखमा चयन भएका कारण उनी मत विभाजनमा सहभागी भएनन् ।