विराटनगरलाई सफा र सुन्दर बनाउन मेयरले मागे सहयोगको

विराटनगर - विराटनगर महानगरपालिकाका प्रमुख नागेश कोइरालाले प्रदेशको राजधानी विराटनगरलाई सफा र सुन्दर बनाउन सहयोगको अपेक्षा गरे । 

महानगरपालिकाको आग्रहमा नियमित कार्यालय प्रमुखको बैठकमा उनले प्रदेशको राजधानी विराटनगर भएकाले यहाँका सबै सरकारी कार्यालय व्यवस्थित एवं फोहरमुक्त हुनुपर्ने आग्रह गरे । 

---

 विराटनगर पर्यटन, शिक्षा र स्वास्थ्यको केन्द्र बन्दै गएकाले यसको आमूल परिवर्तन हुनु आवश्यक छ भने । महानगरपालिकाका उपप्रमुख शिल्पा निरौला कार्कीले विराटनगरलाई सफा, हराभरा एवं सुन्दर बनाउन योजनाबद्धरुपमै लागिपरेको बताए । 

मोरङका प्रमुख जिल्ला अधिकारी काशीराज दाहालले विगतको भन्दा अहिले जिल्लास्थित सेवाप्रदायक कार्यालयबाट सेवाग्राही सन्तुष्ट भएर जाने गरेकाले यसलाई निरन्तरता दिन कार्यालय प्रमुखलाई निर्देशन दिए । उनले राष्ट्रसेवक कर्मचारीले काम, व्यवहार र परिणामबाट जनतालाई सन्तुष्ट पार्नुपर्ने भन्दै सरकारका नीति तथा कार्यक्रमलाई उच्च प्राथमिकतामा राखेर काम गर्नुपर्ने सुझाव दिए । 

कार्यक्रममा महानगरपालिकाका प्रमुख प्रशाकीय अधिकृत विष्णु कोइराला, सुनसरी मोरङ सिँचाइ आयोजनाका प्रमुख भिलानन्द यादव, जिल्ला शिक्षा समन्वय एकाइ मोरङका टंङ्क गौतम,  महानगरपालिका सरसफाइ महाशाखाका संयोजक पुनम दाहाल, राजस्व तथा कर महाशाखा प्रमुख सरोज गौतमले महानगरका विविध पक्षमा चर्चा गरे ।