प्रदेश राजधानीसँग प्रशासनिक सुगमता कायम गर्न सोलु र ओखलढुंगाका सांसदको माग

विराटनगर - सोलुखुम्बु र ओखलढुंगाका प्रदेश सभा सदस्यहरूले प्रदेश १ को राजधानी विराटनगरसँग प्रशासनिक सुगमता कायम गर्न माग गरेका छन् । प्रदेश १ को प्रदेश सभाको सोमबारको बैठकको शून्य समयमा बोल्दै सोलुखुम्बुका सभा सदस्य गोम्बु शेर्पाले प्रदेश राजधानी विराटनगरभन्दा काठमाडौं सहज भएको टिप्पणी गरेका हुन् ।

प्रदेशको मुल पहिचानलाई प्रतिविम्बित गर्ने मुख्य बिषय नै प्रशासनिक सुगमता भएको उनले बताए । ‘सोलुखुम्बुको जनताले प्रशासनिक सुगमताको अनुभूति गर्न पाएको छैन, विराटनगरभन्दा काठमाडौं सहज भएको छ’ उनले भने, ‘विराटनगरमा आउन काठमाडौंभन्दा दुई गुणा समय लाग्छ, दुई गुणा खर्च लाग्छ र दुई गुणा कष्ट व्यहोर्नु पर्ने अवस्था छ ।’ उनले विराटनगरबाट सोलुको काँगेल र फाप्लुसम्मको हवाई सेवा सुचारु गर्न सके सोलुखुम्बुबासीले सुगमता अनुभूति गर्ने बताए । उनले भने, ‘विराटनगर–काँगेल, विराटनगर–फाप्लुमा तुरुन्त बायु सेवा सुचारु गरियोस् ।’

---

ओखलढुंगाका प्रदेश सभा सदस्य प्रदिप कुमार सुनुवारले धुर्मीबाट चतरासम्म निक्सिने सडक अलपत्र परेको भन्दै सरकारको ध्यानाकर्षण गराए । उनले सोलुखुम्बु, ओखलढुंगा र खोटाङका बासिन्दालाई प्रदेश राजधानी विराटनगरसम्मको सुगमता नभएको बताए ।

सरकारसँग उनले सोधे ‘हामीलाई प्रशासनिक सुगमता भएको छैन, विगतदेखि ठेक्का लागेको छ भनिन्छ तर यो बाटोको अवस्था कहाँ पुगेको छ ?’ सुनुवारले सरकारले प्रत्येक स्थानीय तहमा पाँच बेडका हस्पिटल निर्माण गर्ने भनेर निर्माण सुरु गरेको भएपनि ओखलुढुंगामा निर्माण सम्पन्न भएका अस्पतालहरूमा कर्मचारीको व्यवस्थापन नभएको, फर्निचर नभएको बताए ।

अस्पतालहरूमा नेपाल सरकारबाट छात्रवृत्तिमा पढेका डाक्टरहरू अनिवार्य रुपमा दुई बर्षसम्म काम गर्नुपर्ने व्यवस्था गर्न समेत माग गरे । उनले भने ‘ओखलढुंगामा कोहि पनि त्यस्ता डाक्टरहरू गएका छैनन्, सरकारको ध्यानाकर्षण होस् ।’

प्रदेशसभा सदस्यहरू अम्बर बहादुर बिष्ट, कमल प्रसाद जवेगु र खगेश्वरी पौड्यालले धान खेतीको समय सुरु भएको भन्दै सरकारले पर्याप्त मलको व्यवस्थापन गर्नुपर्ने बताए । किसानहरूले समयमा मल प्राप्त गरेनन् भने खाद्य संकट हुने भन्दै उनीहरूले सरकारको ध्यानाकर्षण गराए ।