स्ववियु निर्वाचन: पाँच विद्यार्थी संगठन मिल्दा धनकुटा क्याम्पसमा सर्वसम्मत

विराटनगर - करिब १४ बर्षदेखि स्ववियूविहिन बनेको धनकुटाको धनकुटा बहुमुखी क्याम्पसमा पाँच प्रमुख विद्यार्थी संगठनहरु मिल्दा सर्वसम्मत रुपमा नेतृत्व चयन भएको छ । शनिबार भएको उम्मेदवारको मनोनयन सहमतिबाट गरिएका कारण धनकुटा बहुमुखी क्याम्पसमा १९ सदस्यीय स्वतन्त्र विद्यार्थी युनियन सर्वसम्मत चुनिन लागेको निर्वाचन अधिकृत मान बहादुर भण्डारीले जानकारी दिएका छन् । 

निर्वाचन अधिकृतको कार्यालयले अन्य प्रक्रियाहरु पुरा गरेर सर्वसम्मत रुपमा स्ववियुको कार्यसमिति घोषणा गर्न भने बाँकी रहेको उनले बताए । अध्यक्षमा अनेरास्ववियुका सन्तोष बुढाथोकीको मात्रै उम्मेदवारी दर्ता भएपछि उनी सर्वसम्मत बनेका हुन् । बुढाथोकी अनेरास्ववियु धनकुटाका सचिव समेत हुन् । स्ववियुको सचिवमा नेविसंघबाट सुवास खनाल र कोषाध्यक्षमा अनेरास्ववियुकै युवा तिम्सिना सर्वसम्मत चयन भएका छन् । 

---

त्यसैगरी सदस्यहरुमा अनेरास्ववियुबाट प्रविण खनाल, टेकेन्द्र सापकोटा, नविन पौडेल, भूमीराज राई, सुजन सुवेदी, मुना चापागाँई र कविता विश्वकर्मा चयन भएका छन् । नेविसंघबाट सदस्यहरुमा मेलिना राई, सुवाष भण्डारी र अनिल भट्टराई, अखिल क्रान्तिकारीबाट सदस्यहरुमा विपिनराज थापा, निरुता थापा मगर र किशोरकुमार रायमाझी चयन भएका छन् ।

नेकपा एस निकट अनेरास्ववियूबाट मनोज तामाङ र नानुका ठकुरी तथा जसपा निकट समाजवादी विद्यार्थी युनियनबाट निशा राई सर्वसम्मत चयन भएको जनाइएको छ ।