प्रदेश-१मा कोभिड महामारी : ११७३ जनाको पीसीआर परीक्षण गर्दा ५७८ संक्रमित

विराटनगर  ः प्रदेश–१ मा गरिने पीसीआर परीक्षणमा झण्डै ५० प्रतिशत मानिसलाई कोभिड–१९ संक्रमण देखिएको छ । पछिल्लो २४ घण्टामा प्रदेशमा १ हजार १७३ जनाको पीसीआर परीक्षण गर्दा ५७८ जनामा कोभिड देखिएको हो । 

यसलाई प्रतिशतमा हेर्ने हो भने ४९.२७  प्रतिशत हुन आउँछ । यो दर अहिलेसम्मकै उच्च हो । पछिल्लो २४ घण्टामा प्रदेश १ मा कोरोनाका कारण ४ जनाको ज्यान गएको छ । 

---

परीक्षण गरिएकामध्ये २६३ महिला र ३१५ पुरुषको रिपोर्ट पोजेटिभ आएको सामाजिक विकास मन्त्रालयले जनाएको छ । मोरङमा २११, झापामा १६८, सुनसरीमा ११९, सोलुखुम्वुमा २४, इलाममा २२, धनकुटामा ९, उदयपुरमा ३, संखुवासभा र ताप्लेजुङमा १–१ र प्रदेश १ बाहिरका २० जनामा संक्रमण देखिएको सामाजिक विकास मन्त्रालयले जनाएको छ । 

मोरङको विराटनगरमा ८७ महिला र ९८ पुरुष सहित १८५ जनामा संक्रमण देखिएको छ । यो सँगै प्रदेशमा कोरोना संक्रमितको संख्या ३७ हजार २२३ पुगेको छ । संक्रमितमध्ये ३० हजार २२६ संक्रमणमुक्त भएका छन् भने सक्रिय संक्रमितको संख्या ६ हजार ४५० पुगेको छ । अहिले सम्म प्रदेश १ मा ५४७ जनाको कोरोनाका कारण मृत्यु भइसकेको छ ।