नक्कली लालपुर्जा वितरण गरेर पैसा असुल गरेको आरोपमा चार जना पक्राउ

झापा- नक्कली लालपुर्जा दिएर सर्वसाधारणलाई ठगेको आरोपमा चार जना पक्राउ परेका छन् ।

मेचीनगर नगरपालिका– ६ स्थित मेची डाँडाको ऐलानी जग्गाको नक्कली लालपुर्जा बनाएर वितरण गरेको कार्यमा सलग्न चार जना पक्राउ परेका हुन् । उनीहरूले एक सयभन्दा सर्वसाधरणबाट रकम उठाएर नक्कली लालपुर्जा वितरण गरेको खुल्न आएको थियो ।

---

जिल्ला प्रहरी कार्यालय झापाका एसपी दुर्गाराज रेग्मीका अनुसार नक्कली लालपुर्जा वितरण गर्नेमा मुख्य योजनाकार शिवसताक्षी नगरपालिका– ५ का डिल्लीराम मैनालीसहित मेचीनगर–६ का ७५ वर्षीय भुपध्वज दाहाल, ७३ वर्षीय ज्ञानबहादुर गिरी र ५४ वर्षीय टंक खड्कालाई प्रहरीले हिरासतमा लिएको छ । सो घटनामा सलंग्न एक जना भने फरार रहेका छन् ।

प्रहरीका अनुसार नक्कली लालपुर्जा वितरण गर्ने क्रममा पक्राउ परेकाहरूले एक परिवारसँग ९० हजार रुपैयाँसम्म असुल गरेको खुल्न आएको छ । यसरी वितरण गरेको नक्कली लालपुर्जामा सम्बन्धित जग्गाधनीको फोटो टाँस गर्नुका साथै किर्ते सहीछापसमेत गरिएको भेटिएको थियो ।