संवैधानिक परिषद्को बैठक कहिले राख्नुहुन्छ ? देउवाले भने- म जवाफै दिन्‍न

विराटनगर- नेपाली कांग्रेसका सभापति शेरबहादुर देउवा शनिबार विराटनगर विमानस्थलमा पत्रकारहरूसँग तर्किएर हिँडेका छन् । 

विमानस्थलको भिआइपी कक्षमा विराटनगरका सञ्‍चारकर्मीहरू उनलाई समसामयिक विषयमा प्रश्न सोध्न पर्खिइरहेका थिए । बुद्ध एयरको जहाजबाट ओर्लिएपछि देउवा भिआइपी कक्षमा बस्दै नबसी बाहिरिएका हुन् ।

---

बोल्ने मुडमा नदेखिएका देउवालाई त्यसका बाबजुद पनि पत्रकारहरूले केहि प्रश्नहरूको जवाफका लागि पछ्याइरहे । तर देउवा बोलेनन् । उनी तर्किएर इनरुवातिर लागेका हुन् । 

भिआइपी कक्षबाट निस्किएर बाहिरै केहिबेर पार्टीका नेता कार्यकर्ताहरूसँग अलमलिएका देउवालाई पत्रकारहरूले पछ्याउँदै पुनः सोधे- ‘संवैधानिक परिषद्‌को बैठक कहिले राख्नुहुन्छ ?’ देउवाले भने मुस्कुराउँदै भने– ‘जवाफै दिन्न म के, जवाफै दिन्‍न भनेको ।’

विमानस्थलमा सभापति देउवालाई स्वागत गर्न मोरङ र सुनसरीका नेता कार्यकर्ताहरूको उल्लेख्य उपस्थिति थियो । शनिबार हुन लागेको सुनसरी कांग्रेसको जिल्ला सम्मेलनलाई सभापति देउवासहित केन्द्रीय सदस्य डा.शेखर कोइराला लगायतका नेताहरूले सम्बोधन गर्ने कार्यक्रम रहेको जनाइएको छ । 

उनीहरूले इनरुवाको बवियामा बीपी कोइरालाको शालिक अनावरण गर्ने कार्यक्रमसमेत रहेको छ । आफ्ना कुरा इनरुवाकै कार्यक्रममा राख्‍ने बताउँदै देउवा बाहिरिएका हुन् ।