निवर्तमान मुख्यमन्त्रीको हैसियतमा सिट नराखेको भन्दै हिक्मत कार्कीद्वारा मुख्यमन्त्री थापाको सपथ बहिष्कार

विराटनगर । नेकपा एमाले संसदीय दलका नेता निवर्तमान मुख्यमन्त्री हिक्मत कुमार कार्कीले मङ्गलबार मुख्यमन्त्री नियुक्त भएका उद्वव थापाको सपथ ग्रहण बहिस्कार गरेका छन् । सपथ ग्रहण कार्यक्रममा पुगेका कार्कीले आफूलाई निवर्तमान मुख्यमन्त्रीको हैसियतमा बस्ने सिट व्यवस्थापन नभएको भन्दै सपथ बहिस्कार गरेका हुन् ।

कार्कीले प्रदेश प्रमुख परशुराम खापुङ्गले सत्ता गठबन्धन कै इसारामा काम गरेको आरोप पनि लगाए । 

---

'प्रदेश प्रमुखज्युले केही दिन यता सर्वोच्चको आदेश नमान्ने, संविधानको सर्वोच्चतालाई नस्वीकार्ने काम गरिरहनु भएको छ' कार्कीले भने- 'सरकार अविछिन्न हुनुपर्नेमा निवर्तमान मुख्यमन्त्रीलाई वहाँले अस्विकार गर्नुभयो, विधि, अभ्यास र परम्परालाई लत्याएपछि म सपथ छोडेर निस्किएको छु।'

आज बिहान साढे १० बजेलाई तोकिएको मुख्यमन्त्री थापाको सपथ ग्रहणमा पनि कार्की तोकिएकै समयमा प्रदेश प्रमुखको कार्यालय पुगेका थिए । उनले आफ्नो बस्ने सिट मुख्यमन्त्रीको छेउमा हुनुपर्नेमा जनाएका थिए । तर प्रदेश प्रमुखको कार्यालयले भने कार्कीलाई पूर्व मुख्यमन्त्रीका रुपमा तल सिट राखेपछि उनले सपथ बहिष्कार गरेका हुन् ।