नेम्वाङको योगदान अजम्बरी र अमिटः मुख्यमन्त्री कार्की

विराटनगर - कोशी प्रदेश सरकारका मुख्यमन्त्री हिक्मतकुमार कार्कीले मंगलबार हृदयघातका कारण निधन भएका संविधानसभाका अध्यक्ष, प्रतिनिधि सभा सदस्य तथा नेकपा एमालेका उपाध्यक्ष सुवासचन्द्र नेम्वाङले नेपालको लोकतान्त्रिक संविधान निर्माणमा अजम्बरी र अमिट योगदान रहेको बताएका छन् ।

उनले प्रदेश सरकारका तर्फबाट मंगलबार निकालेको शोक वक्तव्यमा नेम्वाङको असमायिक निधनले सिंगो मुलुक, नेपालको कम्युनिष्ट आन्दोलन, संसद, कानून व्यवसाय, राजनीतिक तथा प्राज्ञिक क्षेत्रलाई समेत ठूलो क्षति पुगेको बताएका हुन् । 

---

नेम्वाङ कानूनको असल विद्यार्थी, सफल शिक्षक र प्रभावशाली कानून व्यवसायी हुँदै नेपाली राजनीतिमा शालिनताका मानकको रुपमा आफ्नो पहिचान बनाएको पनि मुख्यमन्त्री कार्कीले उल्लेख गरेका छन् ।

‘नेपालको कम्युनिष्ट आन्दोलनले असल योद्घा, नेकपा (एमाले) ले शीर्ष नेता, संसदले कुशल सांसद र राजनीतिक तथा प्राज्ञिक क्षेत्रले शालिन र बौद्धिक व्यक्तित्व तथा भरपर्दो अभिभावक गुमाएका छौं’ कार्कीको शोक बक्तव्यमा भनिएको छ ‘नेपालको बामपन्थी तथा लोकतान्त्रिक आन्दोलन र लोकतान्त्रिक संविधान निर्माणमा उहाँले पुर्‍याउनु भएको योगदान नेपालको राजनीतिक इतिहासमा सँधैभरी अजम्वरी र अमिट छाप भएर रहनेछ ।’