विराटनगर- कोशी प्रदेश योजना आयोगमा चार जनालाई सदस्यमा नियुक्त गरेको छ ।

आज साँझ बसेको मन्त्रिपरिषद् बैठकले काठमाडौँ महानगरपालिका–९ का डा सीताराम बस्नेत, सोलुखुम्बुको मुक्ली गाउँपालिका–६ का किशोरकुमार राई, सुनसरीको धरान उपमहानगरपालिका– १२ का भवानीप्रसाद बराल र मोरङ केराबारी गाउँपालिका–२ की नमिता न्यौपानेलाई प्रदेश योजना आयोगको सदस्यमा नियुक्त निर्णय गरेको आन्तरिक मामिला तथा कानुनमन्त्री एवं सरकारका प्रवक्ता लीलाबल्लभ अधिकारीले जानकारी दिए ।

---

बैठकले प्रदेश सरकारलाई आर्थिक भार नपर्ने गरी कोशी प्रदेशसभाका सदस्यहरू राजन किराँती र सम्झना तामाङको क्यानडाको वैदेशिक भ्रमणलाई स्वीकृत गर्ने र कूटनीतिक राहदानीका लागि नेपाल सरकारलाई सिफारिस गर्ने निर्णय गरेको छ । 

यस्तै राजनीतिक आर्थिक र सामाजिक पहिचानका सम्बन्धमा देखापरेका समस्यालाई समाधान गर्नका लागि वार्ताद्वारा शान्तिपूर्ण ढङ्गले समाधान गर्नका लागि ‘राजनीतिक तथा शान्ति वार्ता समिति’ गठन गर्ने निर्णय गरिएको पनि अधिकारीले जानकारी दिए । आर्थिक मामिला तथा योजनामन्त्री रामबहादुर मगरको संयोजकत्वमा गठित समितिको सदस्यमा भौतिक पूर्वाधार विकासमन्त्री गणेश उप्रेती र आन्तरिक मामिला तथा कानुनमन्त्री लीलाबल्लभ अधिकारी र सदस्य सचिवमा आन्तरिक मामिला तथा कानुन मन्त्रालयका सचिव लक्ष्मीप्रसाद पौडेल रहने निर्णय गरिएको सरकारका प्रवक्ता अधिकारीले बताए ।