कोशीमा माओवादीका मन्त्रीहरू राजीनामा बुझाएर सरकारबाट बाहिरिए

काठमाडौँ- कोशी प्रदेशमा सहमतिको सरकार नबन्ने स्थिति भएपछि नेकपा माओवादी केन्द्रका मन्त्रीहरू राजीनामा बुझाएर सरकारबाट बाहिरिएका छन् ।

शुक्रबार माओवादी केन्द्रका स्वास्थ्य मन्त्री राजेन्द्र कार्की, पर्यटन वन तथा वातावरण मन्त्री नारायण बुर्जामगर, भौतिक पूर्वाधार विकास मन्त्री गणेशप्रसाद उप्रेती र पर्यटन राज्य मन्त्री बन्दना झाँगडले मुख्यमन्त्री हिक्मतकुमार कार्कीलाई राजीनामा बुझाएका हुन् । हिक्मतकुमार कार्की नेतृत्वको सरकारलाई दिएको समर्थन तत्काललाई जारी राख्दै माओवादी मन्त्रीहरू सरकारबाट बाहिरिएका हुन् ।

---

राजीनामा बुझेपछि मुख्यमन्त्री कार्कीले आगामी दिनमा सहकार्य हुने गरी मन्त्री तथा राज्यमन्त्रीहरूले गरेका कार्यका लागि धन्यवाद व्यक्त गरे ।

सहमतिको सरकार नबन्ने स्थिति आएपछि र मुख्यमन्त्री कार्कीले मार्गप्रशस्त गर्न घुमाउरो भाषा प्रयोग गरेपछि सरकारबाट राजीनामा दिने निर्णय गरेको नेकपा माओवादी केन्द्र संसदीय दलका नेता इन्द्र आङ्बोले बताए । करिब ७४ दिन माओवादी केन्द्र कोशी प्रदेश सरकारमा सहभागी भएको थियो ।