'कोशी सरकारमा बिहीबारसम्म नेपाली कांग्रेसका मन्त्रीहरू नियुक्त भइसक्ने'

काठमाडौँ - नेपाली कांग्रेस कोशी प्रदेश सभापति उद्धव थापाले कोशी प्रदेश सरकारमा बिहीबार सम्म नेपाली कांग्रेसका मन्त्रीहरू नियुक्त भइसक्ने बताएका छन् । ​

बुधबार विराटनगरमा संचारकर्मीसँग कुरा गर्दै सभापति थापाले बुधबार बसेको कांग्रेसको पदाधिकारीको बैठकले कोशी प्रदेश सरकारमा सहभागी हुने मन्त्रीहरूको नाम टुङ्गो लगाएको बताए ।

---

केन्द्रबाट नाम आउने बित्तिकै सरकारमा मन्त्रीहरूलाई सहभागी गराइने उनले बताए । कांग्रेस कोशी प्रदेश संसदीय दलका नेता समेत रहनु भएको सभापति थापाले कोशी प्रदेशमा मन्त्रालय नबढाउने प्रधानमन्त्री केपी शर्मा ओली र सभापति शेरबहादुर देउवा बीच सहमति भएको जानकारी दिँदै दुबै पार्टीबाट दुई दुई जना राज्य मन्त्री राखिने सहमति भएको जानकारी दिए ।

तत्काल मन्त्रालयको संख्या नबढाइए पनि १३ सदस्यीय मन्त्रिमण्डल बन्ने र कांग्रेस सरकारमा सहभागी भएको केही समयपछि मन्त्रालयको संख्या समेत बढाउन सकिने उनको भनाइ छ । 

थापाले पूर्व मुख्यमन्त्री केदार कार्कीले पार्टीसँग समन्वय नगरी आन्दोलन शुरु गरेका भएपनि यसलाई राजनैतिक रंग दिने भन्दा सहमतिमा टुङ्ग्याउने प्रयास भइरहेको धारणा राखे ।