लेटाङ घटना : आक्रमणबाट महिला प्रहरीको मृत्यु भएपछि तनावग्रस्त, प्रशासनले जारी गर्‍यो कर्फ्यू

विराटनगर- जिल्ला प्रशासन कार्यालय मोरङले लेटाङ नगरपालिकामा अर्को सूचना जारी नभएसम्म कर्फ्यू आदेश जारी गरेको छ । प्रमुख जिल्ला अधिकारी काशीराज दाहालले सोमबार बिहान ७ बजेदेखि अर्को सूचना जारी नभएसम्मका लागि कर्फ्यु आदेश जारी गरिएको बताए ।

दक्षितर्फ वडा नं. ३ र ४ को गंगे चोक र वडा नं. ५ सवै, उत्तरमा वडा नं. ६ वडा कार्यालय क्षेत्र, पुर्वमा मोरङ्गी खोला र पश्चिममा चिसाङ खोला क्षेत्रमा कर्फ्यू आदेश जारी गरिएको प्रजिअ दाहालले जानकारी दिए ।

---

लेटाङ–५ खेरुवास्थित शिक्षा विकास माविका एक शिक्षकले आफ्नै विद्यालयकी १३ वर्षीया छात्रालाई यौन दुर्व्यवहार गरेको भन्दै आन्दोलित बनेका स्थानीय र प्रहरीबीच गएराती भएको झडपमा एक महिला प्रहरीको ज्यान गएको हो । आन्दोलनमा उत्रिएका स्थानीय प्रदर्शनकारीको अन्दाधुन्द आक्रमणमा परी आइतबार राती प्रहरी जवान उर्मिला श्रेष्ठको ज्यान गएको थियो । 

स्थानीय आन्दोलनकारीको आक्रमणपछि भएको झडपमा २८ जना प्रहरी र ७ जना प्रदर्शनकारीहरु घाइते भएको जानकारी आएको प्रजिअ दाहालले जानकारी दिए । अहिले कर्फ्यू लगाइएको क्षेत्रमा नेपाल प्रहरी र सशस्त्र प्रहरी परिचालन गरिएको जनाइएको छ । घटनापछि उत्पन्न हुने असामान्य परिस्थिति नियन्त्रणका लागि कर्फ्यु आदेश लगाउनु परेको प्रजिअ दाहालले बताए ।