सञ्चारमाध्यमलाई व्यवस्थित बनाइने मधेस प्रदेश सरकारको तयारी

जनकपुर - मधेस प्रदेशका गृह तथा सञ्चारमन्त्री भरतप्रसाद साहले सञ्चारमाध्यमलाई व्यवस्थित बनाउने कार्यको थालनी प्रदेश सरकारले सुरु गरेको बताएका छन् । 

मधेस प्रदेश आमसञ्चार प्राधिकरणद्वारा अनलाइन सञ्चारमाध्यम दर्ता एवम् नवीकरण तथा कार्यालयको वेभसाइड शुभारम्भ कार्यक्रममा उनले सञ्चारमाध्यमको दर्ता अभिलेख तयार पार्ने र त्यसलाई व्यवस्थित बनाउने कार्यलाई सरकारले महत्वका साथ अघि बढाएको बताए । 

---

बिना दर्ता अव्यवस्थित रुपमा सञ्चालित सञ्चारमाध्यमलाई कानुनी दायरामा ल्याउनाका साथै लोककल्याणकारी विज्ञापनलगायत सेवासुविधा उपलब्ध गराउने बताउँदै मन्त्री साहले सञ्चारकर्मी र सञ्चारमाध्यमहरूको पेसागत हितका लागि योजनाबद्ध तयारी सरकारले अघि बढेको बताए । 

प्रदेश सरकारले ल्याएको पत्रकारको स्वास्थ्य बीमा कार्यक्रम उनीहरूको हितमा रहेकाले यसलाई व्यवस्थित बनाउन पत्रकार महासंघलगायत सरोकारवाला संघ संगठनहरूले सहयोग गर्नुपर्ने आवश्यकता औँल्याए । 

मुलुकमा संघीय व्यवस्था आइसकेकाले अब पत्रपत्रिकाको कामले काठमाडौँ जानुपर्ने अवस्था आउँदैन्,” मन्त्री साहले भने, “अहिले पनि संघबाट पत्रपत्रिकाको वर्गीकरण भइरहेको छ, यसबाट मधेसका पत्रपत्रिकाको जुन ढङ्गबाट मूल्यांकन हुनुपर्ने हो त्यो हुन नसकेकाले प्रदेश सरकार यसप्रति गम्भीर छ ।” अब हामी प्रदेशबाटै यसलाई व्यवस्थित गर्छौँ मन्त्री साहको भनाइ थियो । 

आमसञ्चार प्राधिकरणका अध्यक्ष श्यामसुन्दर यादवको अध्यक्षतामा आयोजित कार्यक्रममा प्रदेश मिडिया काउन्सिलका अध्यक्ष शिवहरि भट्टराई, नेपाल पत्रकार महासङ्घ मधेस प्रदेशका अध्यक्ष राजेशकुमार कर्णलगायतले सञ्चारमाध्यमको व्यवस्थापनमा सरकारले विशेष ध्यान दिनुपर्नेमा जोड दिए । रासस