राजविराज नगरपालिकाका मेयरले भने - घरको नक्सापास नगरे पानी र बिजुली बन्द गर्छौ

सप्तरी - राजविराज नगरपालिकाका नगरप्रमुख भीमराज यादवले राजविराज नगरपालिकाको ४० प्रतिशत घरको नक्सा पास नभएकोले तत्काल नक्सापास गर्न जिल्लावासीलाई आग्रह गरेका छन्।

उनले नक्सा पास गर्न नगरमा कर्मचारी परिचालन गरिसकेको बताए । जरिवाना छुट गरे पनि लाग्ने शुल्क छुट नहुने उनको भनाइ छ । `नक्सा पास गर्न मानेनन् भने पानी र बत्ती बन्द गर्छु । त्यसपछि कारबाही हुन्छ,` उनले भने ।

---

राजविराज नगरपालिकाले सोमबार नगरपालिका कार्यालयमा नवनिर्वाचित जनप्रतिनिधि र पत्रकारहरूसँगको परिचयात्मक तथा छलफल कार्यक्रममा बोल्दै उनले यस्तो बताएका हुन् ।

राजविराज नगरपालिका कार्यालयमा रहेको असुल हुने बेरुजु सम्बन्धित व्यक्तिलाई प्रशासनमार्फत थुन्न लगाएर भए पनि असुली गरेरै छाड्ने प्रतिबद्धता उनले व्यक्त गरे ।

उनले छोराछोरीसँग बस्न सक्ने अवस्था नरहेका, घरबाट निकालिएका आमाबाबुका लागि तत्काल वृद्धा आश्रम खोलेर सञ्चालनमा ल्याउने बताए । 

विभेदमा परेको विकास हुन नसकेको राजविराज सहरलाई ६ महिनाभित्र गुलाफी सहर बनाउने र त्यसका लागि आफू कठोर बन्नुपर्ने उनले बताए ।

प्रमुख यादवले घुस दिएर गलत काम गराउन खोज्ने र घुस लिएर गलत काम गर्नेलाई समातेर प्रशासनको जिम्मा लगाएर कारबाहीको दायरा ल्याउने बताए ।

सरकारी कार्यालयहरूमा भइरहेको व्याप्त भ्रष्टाचार उन्मुलन गर्ने कार्यमा सधैँ अग्रसर रहने बताए । राजविराजको विकास र यहाँका बेथिति न्यूनीकरणका लागि यहाँका पत्रकारहरूले महत्त्वपूर्ण भूमिका खेलिरहेको उनले बताए ।

राजविराजका एकमात्र सरकारी अस्पताल गजेन्द्रनारायण अस्पताल, शैक्षिक क्षेत्र, मालपोत, नापी लगायतका सरकारी कार्यालयहरू माफिया गुन्डाहरूको अखडा बनेकाले तत्काल सुधा र गर्न लागि परेको उनले जानकारी दिए । घरको काम, व्यक्तिगत व्यवसाय सञ्चालन गरेर सरकारी तलब भत्ता खाने छुट कसैले नपाउने उनले बताए ।