जिसस पर्सामा जसपा र एमाले गठबन्धनका प्यानल विजयी

वीरगञ्ज । जिल्ला समन्वय समिति (जिसस) पर्साकाे प्रमुख र उपप्रमुख सहित पुरै प्यानल जनता समाजवादी पार्टी (जसपा) र नेकपा एमाले गठबन्धनमा उम्मेद्वार विजयी भएका छन् । शुक्रवार सम्पन्न जिससकाे निर्वाचनबाट प्रमुखमा जसपाका निरञ्जन साेनार र उपप्रमुखमा नेकपा एमालेका पुरण प्रसाद कुर्मी लगायत पुरै प्यानलमा साझा उम्मेदवार निर्वाचित भएका हुन् ।

निर्वाचनमा २ मतका अन्तरले सोनार प्रमुखमा निर्वाचित भएका हुन । उनले १५ मत ल्याउँदा उनका निकटतम प्रतिद्वन्द्वी नेपाली कांग्रेस र लोकतान्त्रिक समाजवादी पार्टी (लोसपा) का उम्मेदवार सरोज चौरसियाले १३ मत प्राप्त गरेका थिए । सोनार यसअघि भएको वीरगञ्ज महानगरपालिकाको कार्यपालिका सदस्यमा निर्वाचित भएका थिए ।

---

सदस्यहरूमा जसपाका बैजन्ती देवी, राजपति देवी, बिनय प्रसाद कुर्मी, एमालेका श्रीकान्ती देवी, सुशिला कामी, रामप्रसाद यादव, सलिम मियाँ अन्सारी निर्वाचित भएका छन् । अरु सबैले १५ मत पाउँदा जसपाका बिनय प्रसाद कुर्मीले भने १६ मत प्राप्त गरेको जसपा पर्साका सचिव तबरेज अहमदले जानकारी दिएका छन् ।

पर्सा जिल्लाका १४ स्थानीय तहमध्ये १ महानगरपालिका, ३ नगरपालिका र १० गाउँपालिकामा प्रमुख र उपप्रमुख गरी २८ जना मतदाता रहेका थिए । जिल्लामा कांग्रेसबाट १२, एमालेबाट १०, जसपाबाट ५ र लोसपाबाट १ गरि कुल २८ प्रमुख–उपप्रमुख निर्वाचित भएका छन् ।