'सुशासनको पाँच वर्षमा भ्रष्टाचार मौलायो'

जनकपुरधाम- सुशासनकाे पाँच वर्षमा देशमा भ्रष्टाचार मौलाएको आरोप वक्ताहरूले लगाएका छन् । शनिबार जनकपुरधाममा तराई मधेश लोकतान्त्रिक पार्टी (तमलोपा) द्वारा आयोजित 'स्वशासनको ५ वर्ष' भन्‍ने विषयक गोष्ठी कार्यक्रममा बोल्ने वक्ताहरूले आम जनताले अपेक्षा अनुसारको शासन पाउनुको सट्टा भ्रष्टाचार मौलाएको आराेप लगाएका हुन् ।

कार्यक्रममा तमलोपाका अध्यक्ष वृषेशचन्द्र लालले भने विभिन्न आन्दोलन र जनताको शहादतबाट प्राप्त संघीयतासहितको सुशासनमा भ्रष्टाचार मौलाउँदै गएको बताए । उनले भने, 'यस ५ वर्षको अवधिमा शासनमा पुगेकाहरूले ट्रान्सपरेन्सी दिन सकेन, भ्रष्टाचारलाई नियन्त्रण गर्नुको सट्टा झन प्रश्रय नै दियो, विकासका योजनाहरु ल्याउन सकेन, एक अर्का तहमा समन्वय हुन सकेन ।'

---

उनले साे अवधिमा विकासको नाममा मूर्ति, मन्दिर र गेट निर्माण बाहेक कुनै उत्पादनको एउटा पनि कार्यक्रम ल्याउन नसकेको आराेप समेत लगाए ।

त्यस्तै वरिष्ठ इञ्जिनीयर सत्यनारायण साहले जबसम्म देशमा सुशासन कायम हुँदै तबसम्म देशमा स्वशासनको अनुभूति जनताले गर्न नसक्ने जिकिर गरे । उनले भने, 'सुशासन कायम गर्न सार्वजनिक खरिद ऐनको ठूलो महत्व रहेको छ । तर, शासनमा बसेकाहरूले त्यसलाई नबुझेर हो कि बुझेर पनि सार्वजनिक खरिद ऐन विपरित काम गर्दै आएका छन् ।'

उनले अगाडि भने, 'स्वशासनको ५ वर्षको अवधिमा बनेका सरकारका मन्त्रीहरुले सुशासन कायम गराउनुको सट्टा सार्वजनिक खरिद ऐनको बलजफ्ती दुरूपयोग गरी कर्मचारीहरूबाट काम गराउँदै आएका छन् । जसको परिणाम पछिल्लो पटक मधेश प्रदेशमा सार्वजनिक ऐन मिच्‍न नमान्दा एक मन्त्रीले आफ्नै कर्मचारीलाई कुटेका थिए ।'

कार्यममा बोल्ने अधिकांश वक्ताहरूले देशमा संघीयता आएपछि आएको स्वशासनमा जनताले अपेक्षा अनुसारको त कुरै छाडौँ आवश्यकता अनुरुपको पनि सेवा नपाउने अवस्था रहेको कुरामा जोड दिएका थिए ।

कार्यक्रममा नेकपा एसका नेता शीतल झाले स्वशासनको आडमा यहाँका संस्कृति र पहिचानलाई मेटाउनु प्रयास गरिएको भन्दै प्रदेशको नामाकरण मधेश प्रदेशमा आपत्ति जनाउँदै मिथिलाको इतिहास मेटाएको आरोप लगाए । उनले भने, 'मधेशको कुनै इतिहास छैन, तर मिथिलाको आफ्नो संस्कृति र पहिचानको विश्वकै सबैभन्दा पुरानो इतिहास हो, तर राजनीतिक आडमा मिथिलाको इतिहास मेटाएर मधेशलाई खुम्चाइँयो ।'

नेता झाले मधेश आन्दोलनमा मात्र यही ८ जिल्लाका मधेशीले मात्र आन्दोलन नगरेको पनि उल्लेख गरे । उनले मधेशी पहिचानका लागि आन्दोलनमा होमिएका नेपालगन्ज र विराटनगरका जनता पनि होमिएका बताए । उनले भने, 'यति हुँदा पनि ८ जिल्लामै सीमित हुन गएपछि तिनीहरूको पहिचान के ? अब त उनीहरु न त मधेशी नै रहे न पहाडी, न थारु नै ।'

सो कार्यक्रममा सर्वोच्च अदालतका पूर्व न्यायाधीश गिरिशचन्द्र लालले पनि आफ्ना धारणा राखेका थिए ।