प्रदेश २ मा ७ जना कोभिड संक्रमितको मृत्यु

जनकपुरधाम : कोभिड-१९ संक्रमणका कारण पछिल्लो २४ घण्टामा प्रदेश २ मा ७ जनाको मृत्यु भएको छ । मृत्यु हुनेमा जनकपुरधामका एक, पर्सा जिल्लाका २ र रौतहटका ४ जना रहेका छन् ।

स्वासप्रश्वासमा समस्या देखिएका जनकपुरधामका एग्रो व्यवसायीको काठमाडौस्थित ग्राण्डी अस्पतालमा बिहीबार दिउँसो मृत्यु भएको पारिवारिक श्रोतले जनाएको छ । सुरुमा जनकपुरधामको काव्या अस्पतालमा उपचार गराइरहेका ती व्यवसायीको उपचार सम्भव हुन नसक्दा तीन दिनअघि हेलिकप्टरबाट काठमाडौँ लगिएको थियो ।

---

यस्तै वीरगञ्जको नारायणी अस्पतालमा उपचाररत पर्सा जिल्लाको जगरनाथपुर गाउँपालिका- ८ का ५५ वर्षका पुरुष र वीरगञ्ज महानगरपालिका वडा नम्बर ४ का ७० वर्षका सँक्रमित वृद्धको मृत्यु भएको अस्पतालका कोभिड सँयोजक डा. सरोज रोशन दासले जानकारी दिए।

नारायण अस्पतालमै उपचाररत रौतहट फतेपुरका ६० वर्षकी महिला, बिजयपुरका ४५ वर्षका पुरुष, गौर नगरपालिका २ का ५४ वर्षका पुरुष र गरुडा नगरपालिका ३ का ४७ वर्ष पुरुषको पनि उपचारको क्रममा मृत्यु भएको संयोजक डा. दासले बताए ।