आफ्नै बुवाबाट गर्भवती बालिकाको सम्पूर्ण जिम्मेवारी सयात्री नेपालले लिने

महोत्तरी- आफ्नै बुवाले बलात्कार गरेर १३ वर्षीया छोरीलाई गर्भवती बनाएको घटना बाहिरिएसँगै गैरसरकारी संस्थाहरूले निकै चासो देखाएका छन् । महोत्तरीको बर्दिबास–११ स्थित खयरमारा स्थायी घर भई हाल भक्तपुर बस्ने आफ्नै छोरी संगीता (नाम परिवर्तन )लाई आमा नभएको मौका छोपी बलात्कार गरेर गर्भवती बनाएको घटना १८ चैतमा बाहिर आएको थियो । 

घर महोत्तरी भए पनि घटना भने भक्तपुरमा भएकाले महोत्तरी प्रहरीले पीडित बालिकालाई गत शनिबार भक्तपुर प्रहरीलाई जिम्मा लगाएको थियो । सबै घटना सार्वजनिक भएपछि पीडित बालिकाको सम्पूर्ण जिम्मेवारी सयात्री नेपालले लिएको छ । ‘मैले बालिकालाई गएर भेटेँ । उनको अवस्था निकै दयनीय छ । हामी पीडित बालिकाको भरणपोषणदेखि सम्पुर्ण जिम्मेवारी लिन चाहन्छौँ,’ सयात्रीकी अध्यक्ष गीता केसीले बताइन् ।

---

आमा सुनिता (नाम परिवर्तन )ले  सोधखोज गर्ने क्रममा बुवाले नै बलात्कार गरेर गर्भ बसेको बालिकाले बताएपछि घटना बाहिर आएको हो । भक्तपुरबाट १४ चैतमा तीन छोराछोरीलाई बोकेर महोत्तरीस्थित घर खयरमारा आइपुगेकी आमा सुनिताले नै सञ्चारकर्मीहरूलाई बोलाएर घटना सार्वजनिक गरेकी हुन् । 

कसरी भएको घटना ?
रामबहादुरका एक छोरा र दुई छोरी छन् । पीडित संगीता जेठी छोरी हुन् भने अन्य दुई जना सानै छन् । आर्थिकरुपमा निकै कमजोर रहेको यो परिवार धादिङको इँटाभट्टामा काम गर्दै आएको थियो ।

इँटाभट्टामा काम छोडेर सपरिवार असोजतिर कामकै खोजीमा भक्तपुर पुगेको थियो । श्रीमान्‌ र सुनिता दिउँसो सँगै मजदुरी गर्न निस्कन्थे । कहिलेकाहीँ सन्चो भएन भन्दै रामबहादुर घरमै बस्थे अनि सुनिता एक्लै काम गर्न जान्थिन् ।

घटना कात्तिक महिनातिरको हो । सुनिता माइत गएकी थिइन् । पीडित बालिका संगीताका अनुसार आफ्ना बुबा रामबहादुरको गिद्धे नजर त्यही समयदेखि पर्‍यो । ‘ममी मामाघर गएको बेला भाइ, बहिनी सुते अनि मलाइ बाबाले जबरजस्ती गर्नुभयो,’ पीडित बालिका संगीताले भनिन्, ‘मेरो मुख छोप्नुभयो, कराएमा मार्ने धम्की दिनुभयो, अनि मलाई पटकपटक बलात्कार गर्नुभयो ।’ 

बुवाले आफूले गरेको विषय कसैलाई भनेमा आमा, भाइबहिनी सबैलाई मारिदिने धम्की दिने गरेको उनले बताइन् । आफू कतै गएकाबेला छोरीमाथि गिद्धे नजर राख्ने गरेको पीडित बालिकाको आमाले बताइन् ।

सम्बन्धित समाचार

१३ वर्षीया बालिकाको पेटमा आफ्नै बुवाको बच्चा