जनकपुरधाम- मधेश प्रदेश सरकारको मन्त्रालय बाँडफाँटबारे ६ दलीय गठबन्धनको बैठक विनानिष्कर्ष टुङ्गिएको छ । सोमबार मुख्यमन्त्री तथा मन्त्रिपरिषदको कार्यालयमा बसेको बैठकमा मन्त्रालय बाँडफाँटमा कुरा मिल्न नसक्दा बैठक विनानिष्कर्ष टुंगिएको हाे । मन्त्रालय बाँडफाँटबारे कुरा नमिले पनि सरकार सञ्चालनबारे सैद्धान्तिक सहमति भएको बताइएको छ ।

बैठकमा सरकार सञ्चालनसहित कुन पार्टीलाई कति र कुन मन्त्रालय दिने लगायतका विषयवस्तुमा सैद्धान्तिक छलफल भए पनि टुंगाे लाग्न नसकेको बैठकमा सहभागी जनमत पार्टी मधेश प्रदेश संसदीय दलका नेता महेश यादवले बताएका छन् । उनले भने, ‘बैठकमा सबै दललाई सम्मानजनक रूपमा समेटेर लग्ने कुरा भए पनि कुन दललाई कुन र कति वटा मन्त्रालय दिने भन्ने बारेमा छलफल भएपनि टुंगाे लाग्न सकेन ।’

---

बैठकमा सहभागी लोकतान्त्रिक समाजवादी पार्टी (लोसपा) नेपालका दलका नेता अभिराम शर्माले मन्त्रालय बाँडफाँट कुरा उठे पनि सैद्धान्तिक विषयहरूमा छलफल मात्रै भएको र अब भोलि बस्ने बैठकबाट टुंगाे लाग्न सक्ने बताए ।

सरकार सञ्चालनबारे के कस्ता विषयमा सैद्धान्तिक सहमति भएको बारे नेता शर्माले नीति तथा कार्यक्रम कस्तो ल्याउने र बजेटमा सबै वर्गलाई कसरी समेट्न सक्ने लगायतका विषयवस्तुहरूमा सैद्धान्तिक सहमति भएको उल्लेख गरे ।

मुख्यमन्त्री सरोजकुमार यादवको अध्यक्षतामा बसेको बैठकमा कांग्रेसका कृष्ण यादव, लोसपाका अभिराम शर्मा, जनमत पार्टीका महेश यादव, माओवादी केन्द्रका भरतप्रसाद साह, नेकपा (एस) का गोविन्द न्योपानेको सहभागिता रहेको छ ।

शुक्रबार सत्तारूढ दलका शीर्ष नेताहरूसहित प्रदेशका दलीय नेताहरूको सहभागितामा भएको बैठकले वर्तमान जसपा नेतृत्वका सरकारलाई यथावत राख्दै मधेश प्रदेशमा आलोपालो सरकारको नेतृत्व गर्ने निर्णय भएको थियो ।

अर्को कार्यकालको नेतृत्व कुन दलले कति समयका लागि नेतृत्व पाउने र मन्त्रालय भागबण्डाबारे आइतबार जनकपुरधाममा बस्ने प्रादेशिक दलीय नेताहरूबीचको छलफलबाट प्याकेजमा सहमति गरिने निर्णय गरिएको थियो ।