कसले राख्यो वीरगञ्जको नालीमा एक सय दुई राउण्ड गोली ?

काठमाडौं– वीरगञ्ज नगरपालिका–१० स्थित एक नालीमा रहेको फोहरमा एक सय दुई राउण्ड गोली फेला परेको छ । विभिन्न हतियारमा प्रयोग हुने गोली बेवारिसे अवस्थामा भेटिएको हो ।

आइतबार बिहान जेसिबीको सहयोगमा नाली सफा गर्ने क्रममा फोहोरमा शंंकास्पद रूपमा प्लाष्टिकको झोला फेला परेको थियो । शंकास्पद वस्तु भएपछि प्रहरी पुगेर जनप्रतिनिधिको रोहबरमा प्लाष्टिक खोल्दा गोली फेला परेको जिल्ला प्रहरी कार्यालय पर्साका डिएसपी एवं सूचना अधिकारी निर्मल बुढाथोकीले जानकारी दिए ।
उनका अनुसार बिग्रेका खोकासहित विभिन्न हतियारमा प्रयोग हुने गोली भेटिएको हो । ‘चार राउण्ड बिग्रिएको खोका रहेको छ,’ उनले भने ।

---

फेला परेकामध्ये हर्नेटको १७ राउण्ड, एसएल आरको चार राउण्ड, ९ एमएम ३२ राउण्ड, ३८ बोरका चौबीस राउण्ड, ४५ एमएमको चार राउण्ड गोली फेला परेको हो । त्यस्तै फडेरल ८ राउण्ड, विनचेस्टर पाँच राउण्ड, ७.६५ ५४ एमएमको तीन राउण्ड, ७ एमएम एक राउण्ड गोली फेला परेको प्रहरीले जनाएको छ ।
‘फोहरमा गोली कसले राख्यो भन्नेबारे अनुसन्धान गर्दैछौं,’ उनले भने, ‘कानुनी रित पुर्याएर बरामद गरी कार्यालयमा ल्याई थप अनुसन्धान भइरहेको छ ।’