डाक्नेश्वरी नपाका उपमेयरविरुद्ध मुद्दा दायर गर्न आदेश

राजविराज - सप्तरीको डाक्नेश्वरी नगरपालिकाका उपमेयर मीरा यादवबिरुद्ध मुद्दा दर्ता गर्न उच्च अदालत जनकपुर इजलास, राजविराजले आदेश दिएको छ ।

भारतीय नागरिक मीरा नेपालको नागरिकता लिई उपमेयर समेत बनेको र प्रहरी, प्रशासनले मुद्दा दर्ता गर्न नमानेको भन्दै डाक्नेश्वरी नपा ३ बस्ने कृष्णकुमार यादवले परमादेश आदेशको माग गर्दै उच्च अदालतमा मुद्दा दायर गरेका थिए । 

---

गत ५ जेठमै मुद्दाको भएको फैसला बमोजिम अदालतले बुधबार उच्च सरकारी वकिलको कार्यालय, राजविराजलाई आदेशको जानकारी गराइदिन पत्र पठाएको छ । परमादेशमा यस अदालतबाट जेठ ५ गते आदेश भई उक्त आदेश असार ३ गते प्रमाणीकरण भएको हुँदा उक्त आदेशको प्रमाणित प्रतिलिपि समेत यसै साथ राखी जानकारी गराइएको छ’ भनिएको छ । 

‘निवेदक कृष्णकुमार यादवले दर्ता गरेको मुद्दामा जिल्ला प्रहरी कार्यालय राजविराज, सप्तरीलाई विपक्षी बनाइएको थियो । उपप्रमुख मीराकुमारी यादव र उनका पति महेन्द्रकुमार यादव भारतको बिहारस्थित मझारी पञ्चायत अन्तर्गतको मझारी गाउँका स्थानीय भएको भन्दै साउन २०७९ मा जिल्ला प्रशासन कार्यालयमा उजुरी समेत परेको थियो । 

मीरा, महेन्द्रसहित उनीहरूका सन्तानले समेत झुठा विवरण पेस गरेर नागरिकता लिएको दावी गरिएको छ । भारतको निर्वाचन नामावली २०२२ मा मीराको नाम रहेको दाबी यादवको रहेको छ । अनुमण्डलीय न्यायालय, निर्मलीमा महेन्द्र र मीराले पेस गरेको शपथ पत्र तथा भारत निर्वाचन आयोगबाट लिएको पहिचानपत्र समेत बाट उनीहरू भारतीय रहेको प्रमाणको रुपमा उजुरीमा भनिएको छ ।