अल्पमत-बहुमतकाे खेल : धनुषाका ५ पालिकाले ल्याउन सकेन बजेट

जनकपुरधाम । अल्पमत बहुमतकाे कारण धनुषाको पाँच वटा स्थानीय तहले आगामी आर्थिक वर्ष २०८०/०८१ का लागि बजेट ल्याउन सकेकाे छैन । 

बजेट बाँडफाँटमा विवाद भएपछि अल्पमत परेकाहरूले बजेट ल्याउन नसकेको हाे । असार १० गतेभित्र सबै स्थानीय तहले बजेट ल्याइसक्ने कानुनी प्रावधान छ । तर, जिल्लाका मिथिला नगरपालिका, कमला नगरपालिका, शहीदनगर नगरपालिका, धनौजी गाउँपालिका र औरही गाउँपालिकाले निर्धारित समयमा बजेट ल्याउन सकेकाे छैन । 

---

मिथिला नगरपालिकाका प्रमुख महेन्द्र महतोले नेकपा एमालेबाट निर्वाचित जनप्रतिनिधिहरुको आन्तरिक विवादका कारण बजेट प्रभावित हुन गएको बताएका छन् । पटक–पटक नगरसभा गर्ने प्रयास गरे पनि असफल भएको उनकाे गुनासाे छ । मेयर महताेले भने ‘दुई पटक नगरसभा गर्ने विषयमा कार्यपालिका बैठक आह्वान गर्‍यौं । तर दुवै पटक एमालेबाट निर्वाचित जनप्रतिनिधिहरु अनुपस्थित भएर सहयाेग गरेनन् । 

यस्तै, धनौजी गाउँपालिकाका अध्यक्ष राजकुमार साहले बजेट ल्याउने प्रयासमै रहेको बताए । साे पालिकामा पनि योजना बाँडफाँटमा विवाद रहेको बुझिएको छ ।
कमला नगरपालिकाले नीति तथा कार्यक्रम ल्याए पनि बजेट ल्याउन सकेका छैन । उपप्रमुख शिलादेवी मण्डलले बजेट आउन समय लाग्ने बताइन् ।

जनप्रतिनिधिहरुको विगतकै माग पूरा नभएको कारणले बजेट नआएको उनले बताइन् । यसअघि उनले चालु आर्थिक वर्षको नगरसभा खारेजको माग गर्दै उच्च अदालत जनकपुरमा मुद्दा नै दिएकी थिइन् ।

शहीदनगर नगरपालिकामा नगरसभा हुने बारे कुनै तयारी छैन् । जनप्रतिनिधिहरु नगर प्रमुखसँग असन्तुष्ट छन् । नगर प्रमुख दिनेशप्रसाद यादवले बजेट ल्याउन केही समय लाग्ने बताएका छन । सबै पक्षलाई समेटेर अगाडि बढ्न खोज्दा निर्धारित समयमा बजेट ल्याउन नसकेको उनले बताए ।

यस्तै, औरही गाउँपालिकाका अध्यक्ष उमाशंकरप्रसाद साहले अन्य पार्टीबाट निर्वाचित जनप्रतिनिधिहरुले विवाद खडा गरेको कारण बजेट ल्याउन नसकेकाे बताएका छन् ।