महेन्द्र यादवमाथिको आक्रमणविरुद्ध जनकपुरधाममा प्रदर्शन

जनकपुरधाम- नेपाली कांग्रेसका सहमहामन्त्री महेन्द्र यादवमाथि गरिएको संघातिक आक्रमणविरुद्ध जनकपुरधाममा चक्काजामसहित विरोध प्रदर्शन गरिएको छ । ​कांग्रेस निकट भ्रातृसंगठन नेपाल विद्यार्थी संघ र तरुण दलले बिहीबार जनकपुरधामस्थित रामानन्द चोकमा चक्का गर्दै टायर बालेर विरोध प्रदर्शन गरेका हुन् । उनीहरूले दोषीमाथि तत्काल कडाभन्दा कडा कारबाहीको माग गरेका छन् । 

प्रदर्शनमा सहभागी तरुण दल धनुषाका अध्यक्ष संजय कर्णले कांग्रेस नेता यादवमाथि लोकतन्त्र र संघीयता विरोधीले आक्रमण गरेका भन्दै आक्रमण गर्ने गिरोहलाई पहिचान गरी कारबाही गर्न माग गरे । उनले भने, 'मरिसकेका राजालाई पुनः फर्काउने योजना राजावादीहरूको कुनै पनि हालतमा साकार हुन सक्दैन ।'

---

राजतन्त्र फर्काउन सक्ने आश नदेखेपछि राजावादीहरूले लोकतन्त्र तथा संघीयतावादी नेताहरूलाई आक्रमण गर्न थालेको आरोप उनले लगाए ।

यस्तै प्रदर्शनमा सहभागी नेपाल विद्यार्थी संघ धनुषाका अध्यक्ष सुजित यादवले कांग्रेस नेता यादवमाथि कारबाही गर्न सकिएन भनि गृहमन्त्रीलाई तत्काल राजीनामा दिनुपर्ने माग गरे । यादवले भने, 'हाम्रो प्रदर्शन दोषीमाथि कडाभन्दा कारबाही र देशको शान्ति सुरक्षामा असफल भएका गृहमन्त्रीको राजीनामा मागका लागि रहेको छ ।'

प्रदर्शनमा सहभागीहरूले राजसंस्था चाहिँदैन भन्दै रामानन्दचोकस्थित गाडीहरूलाई रोकेर प्रदर्शन गरेका थिए । उनीहरूले रामानन्दचोकमा एक घण्टा चक्काजाम समेत गरेका थिए । सोही क्रममा गरिब निमुखाहरूले चलाउने अटो रिक्सालाई उनीहरूले तोडफोड समेत गरेका छन् । प्रदर्शनको स्थानीयले समर्थन गरे पनि अटो रिक्सा लगायतमा गरिएको क्षतिको विरोध जनाएका छन् ।

बुधबार काठमाडौँस्थित भृकुटी मण्डप नजिक आफू राजावादी र राष्ट्रवादी हुँ भन्दै एक समूहले सहमहामन्त्री यादवमाथि खुकुरी प्रहार गरेका थिए । आक्रमणबाट गम्भीर घाइते यादवको काठमाडौँमै उपचार भइरहेको छ ।