एक महिनापछि खुल्यो गरुडा नगरपालिकामा लगाएको ताला

माघ- एक महिनाको लामो तलाबन्दी पछि रौतहटको गरुडा नगरपालिकाको तालाबन्दी खुलेको छ ।

एक महिना भन्दा बढी दिनदेखि गरुडा नगरपालिका कार्यालयमा लगाइएको ताला सोमबार बेलुका ७ बजे खुलेको हो ।

---

नगर उपप्रमुख पुनमदेवी चौधरीसहित ६ जना वडा अध्यक्षहरूले विभिन्न माग राख्दै विगत एक महिनादेखि नगरपालिका कार्यालयमा तालाबन्दी गरी मुलगेटमा धर्ना दिँदै आएका थिए ।

नगर प्रमुख कन्थमनि प्रसाद जयसवालले आन्दोलनरत जनप्रतिनिधिहरूको माग सम्बोधन गर्ने लिखित सहमति गरेपछि नगर उपप्रमुख चौधरीसहित आन्दोलनरत वडा अध्यक्षहरूले आज ताल्चा खोलेका हुन् । जिल्ला प्रशासन कार्यालय गौर रौतहटमा मेयर जयसवालर र आन्दोलनरत पक्षबीच विभिन्न बुँदामा लिखित सहमति भएपछि आन्दोलनरत जनप्रतिनिधिहरूले आन्दोलनका कार्यक्रम फिर्ता लिँदै पालिका कार्यालयमा लगाएको ताल्चा खोलेको जनाएका छन् ।

ताल्चा खुलाउन जिल्ला प्रशासन कार्यालय रौतहटमा यसअघि दुवै पक्षबीच पटक पटक वार्ता हुँदै आएपनि कुरा न मिलेपछि उक्त वार्ता असफल हुँदै आएको थियो । तर सोमबार पुनः जिल्ला प्रशासन कार्यालयमा दुवै पक्षबीच भएको वार्तामा सहमति जुटेको थियो । वार्ता सफल भएपछि गरुडा नगरपालिकाका मेयर, उप मेयर, वडा अध्यक्षहरूबीच लामो समयदेखि हुँदै आएको आपसी द्वन्द, मनमुटाव, मतभेद र विवाद अन्त्य भएको छ ।