धनुषा र महोत्तरीमा एक साता निषेधाज्ञा थपियो

जनकपुरधाम : कोरोना संक्रमण दरमा सुधार आएको भन्दै निषेधाज्ञा खुकुलो बनाउँदै धनुषा र महोत्तरीमा एक/एक साता बढाइएको छ । विश्वव्यापी महामारीको रुपमा फैलिएको नयाँ भेरिएन्टसहितको कोरोना संक्रमण दर कम भएको भन्दै दुवै जिल्लामा निषेधाज्ञा खुकुलो बनाइएको हो ।

धनुषामा असार ७ गते राति १२ बजेदेखि लागू हुने गरी १४ गते राति १२ सम्मका लागि र महोत्तरी जिल्लामा असार १५ गते राति १२ बजेसम्मका लागि निषेधाज्ञा थपिएको छ । कोभिड व्यवस्थापन समितिको बसेको बैठकको सिफारिसको आधारमा कोभिड-१९ संकट व्यवस्थापन अध्यादेश, २०७८ को दफा ४ र स्थानीय प्रशासन ऐन २०२८ को दफा ६ को उपदफा ३ बमोजिम दुवै जिल्लामा निषेधाज्ञा बढाइएको हो ।

---

धनुषामा बिहान ६ बजेदेखि दिउँसो ३ बजेसम्म पसल सञ्‍चालन गर्न इजाजत दिइएको छ कुरा प्रमुख जिल्ला अधिकारी बन्धुप्रसाद बास्तोलाले जनाएको छ । उनले भने 'अन्य व्यवस्था पछिल्लो निषेधाज्ञा जस्तै रहेको तर अत्यावश्यक सामाग्रीसहितका व्यवसाय पसलका लागि ३ बजेसम्मका लागि खुकुलो बनाइएको हो ।

निषेधाज्ञामा निजी सवारी साधन सञ्‍चालनमा छुट दिइएको छ । मंगलबारदेखि जोरबिजोर प्रणालीमा मोटरसाइकल, सिटी रिक्सालगायतका तीन पांग्रे यातायात सञ्‍चालन हुने उनले बताए ।

त्यस्तै महोत्तरीमा पनि बिहान ६ बजेदेखि दिउँसो ३ बजेसम्म पसल उद्योग व्यवसाय सञ्‍चालन गर्न आदेश दिइएको छ । स्थानीय प्रशासनले खाद्यान्‍न, फलफूल, तरकारी, दुध/डेरी, ग्याँस पसल, कृषिजन्य विक्री गर्ने पसल, हार्डवेयर पसल, पुस्तक पसल, कपडा पसल, सुनचाँदी, टेलिरिङ, भाँडा, भान्साजन्य, विद्युतिय सामाग्रीलगायतका अत्यावश्यक यस अवधिमा मात्र खोल्न पाइनेछ ।

महोत्तरीमा दुई पाङ्ग्रे, चार पाङ्ग्रे निजी सवारी साधनलाई चलाउन दिने निर्णय भएको हो । त्यस्तै एम्बुलेन्स, शववाहन, खाद्यसामाग्री, औषधि, निर्माण सामाग्री, मल तथा वीउ बिजन बोकेको सवारी साधन, सरकारी नम्बर प्लेट भएको गाडी, झण्डाबाहक सवारी साधन, कुटनीतिक नियोगलगायतको सवारी साधनमा कुनै रोक लगाइएको छैन ।