चोरलाई हत्या गरेको आरोपमा पुजारीसहित दुई पक्राउ

जनकपुरधाम : चोरलाई हत्या गरेको आरोपमा बारा प्रहरीले मन्दिरका पुजारीसहित दुई जना पक्राउ गरेको छ । पक्राउ पर्नेमा बिश्रामपुर गाउँपालिका-२ बरैनिया बजारस्थित रहेको हनुमान मन्दिरका पुजारी ७२ वर्षीय वीरबहादुर यादव (दास बाबा) र फेटा गाउँपालिका-३ फुलवरिया टोल बस्‍ने ३५ वर्षीय पारस महतो धानुक रहेको प्रहरीले जनाएको छ ।

मन्दिरमा चोरी गर्न गएका बरैनिया बस्‍न २५ वर्षीय भादो भन्‍ने वीरेन्द्र बैठालाई चिम्टा र भाटाले पिटेर हत्या गरिएको अवस्थामा सडक पेटीमा शव फेला परेको जिल्ला प्रहरी कार्यालयले जनाएको छ । चिम्टा र भाटाले पिट्दा मृत्यु भएको बैठाको शव सडक पेट्टीमा फालेका थिए । तालिम प्राप्त कुकुरसहितको विशेषज्ञ प्रहरी टोली झिकाई घटनास्थलको सुक्ष्म अनुसन्धान गर्दा हत्याराहरुलाई पक्राउ गरिएको बारा प्रहरीका प्रवक्ता गौतम मिश्रले जानकारी दिए । 

---

मृतकलाई चोरी गर्ने क्रममा गाउँलेहरूले धेरै पटक कुटपिट गरी छाड्ने गरेका थिए । बरैनिया बजारस्थित हनुमान मन्दिरको प्राङ्गणमा सर्च गर्ने क्रममा प्रहरीले अनुसन्धान गर्दै जाँदा अभियुक्तहरूलाई पक्राउ गरिएको जिल्ला प्रहरी कार्यालय बाराले जनाएको छ ।