जनकपुरधाम - प्रदेश २ मा सरकार परिवर्नत नहुने गठबन्धनमा आवद्ध दलका नेताहरूले स्पष्‍ट पारेका छन्। मुख्यमन्त्रीसहित मन्त्रिपरिषद् फेरबदल हुने चर्चाकाबीच नेकपा (एकीकृत समाजवादी)का प्रदेश संसदीय दलका नेता शत्रुध्‍न महतोले प्रदेश २ मा सरकार परिवर्तनको सम्भावना नरहेको बताए । एकीकृत समाजवादी सरकारमा सहभागी नभएको भए पनि प्रदेश २ सरकार परिवर्तन नहुने उनले बताए ।

'प्रदेश २ मा सबैभन्दा बढी सीट जनता समाजवादी पार्टीसँग छ । जसपा बाहेक हामी गठबन्धन दल चाहेर पनि सरकार बनाउन सक्ने सीट पर्‍याउन सक्दैनौँ' आइतबार इकागजसँग उनले भने, 'गठबन्धन भित्रका कुनै दलले चाहेर पनि परिवर्तन गर्न सक्ने सम्भावना छैन । मन्त्रालयको जिम्मेवारी हेरफेर गरेर समायोजन गर्ने तयारL भइरहेको छ ।'

---

हालसम्म नेकपा एकीकृत समाजवादी पार्टी सरकारमा सहभागी भएको छैन । समाजवादी पनि सरकारमा सहभागी हुने तयारीमा छ । तर, मन्त्रालयको भागवण्‍डाका विषयमा कुरा नमिल्‍दा सहभागी हुने ढिलाइ भएको छ । छठपछि आफूहरू सरकारमा सहभागी हुने महतोले बताए । समाजवादीलाई प्रदेश मामिला, न्याय तथा कानुन र उद्योग, पर्यटन तथा वाणिज्य मन्त्रालयमा सहमति जनाउन सरकार नेतृत्वकर्ता दल जसपाले भन्दै आएका छन् । तर आफूले समाजिक विकास मन्त्रालय र अर्थमन्त्रालय माग गरेको उनले बताए ।

प्रदेश २ सरकारका प्रवक्‍ता तथा अर्थमन्त्री शैलेन्द्र साहले पनि सरकार परिवर्तनको कुनै सम्भावना नरहेको बताए । तर, मन्‍त्रिपरिषद् पुनर्गठन भने हुनसक्‍ने उनको भनाइ छ ।

प्रदेश २मा जसपाबाहेक कांग्रेससँग १९, नेकपा एसको १३ र माओवादी केन्द्रसँग ८ गरी कूल ४० सिट छ । जबकि सरकार बनाउन कम्तिमा ५३ सांसद चाहिन्छ । जसपाको मात्रै ३८ वटा सिट भएका कारण प्रतिपक्षी लोसपालाई मिलाएर अघि बढे नयाँ सरकार बनाउन सकिन्छ । तर केन्द्रीय तहमा उनीहरूको एमालेसँग छुट्टै गठबन्धन भएको कारण प्रदेशमा मिलाउन सम्भव नभएको जसपा नेतृत्वको सरकारलाई परिवर्तन गर्ने सम्भावना छैन ।