गजेन्द्रनारायण सिंह अस्पतालका भेन्टिलेटर सञ्‍चालनमा नआउँदा अकालमा ज्यान गुमाउँदै संक्रमित

राजविराज : सप्तरीमा कोरोना संक्रमित दिन प्रतिदिन थपिँदै गएका छन् । तर, सरकारले स्वास्थ्य सामग्री र स्वास्थ्यकर्मीको उचित व्यवस्थापन गर्न सकेको छैन । 
संक्रमित बिरामी उपचारबाट वञ्चित भएका छन् भने महामारी भयावह बन्न सक्ने भन्दै सर्वसाधारण चिन्तित बनेका छन् । तर, यहाँको गजेन्द्र नारायण सिंह अस्पतालमा ४ ओटा भेन्टिलेटर प्रयोगविहीन बनेका छन् भने कोरोना तथा अन्य जटिल रोगबाट पीडित बिरामीको उपचारमा समस्या भएको छ ।

तत्कालीन स्वास्थ्य तथा जनसंख्यामन्त्री उपेन्द्र यादवको पहलमा उपलब्ध गराइएको ४ थान भेन्टिलेटर तथा आइसीयू उपकरण व्यवस्थापन र सञ्चालन गर्ने पूर्वाधार तथा जनशक्ति नभएका कारण त्यसै थन्क्याएर राखिएका छन् । 

---

कोभिड व्यवस्थापनअन्तर्गत रहेको अस्पतालमा अहिले भएको जनशक्तिबाट सामान्य किसिमको रोगीको पनि उपचार हुने अवस्था छैन । ५० शय्याको उक्त अस्पतालमा अहिले १ सय ४० शय्या सञ्चालनमा छन् । ५० शय्याकै दरबन्दी रहेको जनशक्तिमा अहिले ५० प्रतिशत रिक्त छन् । यसबाहेक यही जनशक्तिले १ सय ७८ शय्याको आइसोलेसन समेत हेर्न परिरहेको छ । त्यसमाथि केही चिकित्सक र स्वास्थ्यकर्मी संक्रमित भएका छन् भने केहीलाई लगातार क्वारेन्टाइन बस्नुपर्ने अर्को बाध्यता छ ।

सप्तरीमा कोरोना संक्रमणबाट २३ जनाको ज्यान गइसकेको छ । ती सबैको भेन्टिलेटर र आइसीयू नभएका कारण अन्यत्र लैजाँदा उपचारमा भएको ढिलाइले ज्यान गएको नागरिक सञ्जाल सप्तरीका अध्यक्ष सुखराम यादवले बताए । 

देशकै पुरानोमध्येको एक मात्र सरकारी अस्पतालको जिम्मेवारी ठूलो भए पनि आवश्यक जनशक्ति र उपकरण नहुँदा बिरामीको उपचारमा अस्पताल निरीह बनिरहेको छ भने मानिसहरूले अकालमै ज्यान गुमाउन परिरहेको छ । 

अस्पतालका मेडिकल सुपरिटेन्डेन्ट डा. रञ्जित झाले जटिल समस्यामा पुगेका बिरामीहरूलाई भेन्टिलेटर र आइसीयू अति आवश्यक हुने भए पनि त्यसको व्यवस्थापन नहुँदा अन्यत्र रेफर गर्न बाध्य हुनुपरेको सुनाए । ‘त्यसको लागि हामीले टेन्डर गरिसकेको छौं एक महिनाभित्रमा  आवश्यक व्यवस्था हुनेछ,’ उनले भने । 

कोरोना संक्रमण बढेसँगै यहाँका अस्पतालहरूमा बिरामीको चाप तथा अकालमै ज्यान गुमाउनेको संख्यासमेत बढ्दै गएको छ । आइसीयू र भेन्टिलेटर सञ्‍चालनमा भइरहेको ढिलाईप्रति स्थानीय आक्रोशित भएका छन् । 

संक्रमित तथा जटिल रोगका बिरामीको ज्यान जोगाउन अविलम्ब आवश्यक पूर्वाधार र जनशक्तिको व्यवस्थापन गरी भेन्टिलेटर र आइसीयू सेवा सञ्चालन गर्न स्थानीयले माग गरेका छन् ।

प्रदेशमा भेन्टिलेटर अभाव रहेको विषयमा आलोचना हुन थालेपछि गत वैशाख ८ गते प्रदेश सरकारको मन्त्रिपरिषद् बैठकले ५० ओटा भेन्टिलेटर खरिद गर्ने निर्णय गरेको थियो । भेन्टिलेटर खरिद गर्नका लागि प्रदेश सरकारले प्रत्येक जिल्लामा भेन्टिलेटरसहितको आइसीयू कक्षको व्यवस्था गर्न बजेट निकासा गरिसकेको छ । तर, निर्णय गरेको पाँच महिना बितिसक्दा पनि खरिद गर्न भने सकेको छैन ।