उपभोग्तालाई ठग्‍ने ८० फार्मलाई १९ लाख जरिवाना

वीरगन्ज : उपभोग्तालाई ठगी गर्ने ८० वटा फर्मलाई कारबाही गरिएको छ । चालु आर्थिक वर्षको पुष महिनासम्ममा वाणिज्य आपूर्ति तथा उपभोक्ता संरक्षण कार्यालयले खरीद बिलविजक नराख्ने, गुणस्तरहीन सामान बेच्ने तथा मूल्यसूची नराख्ने ८० ओटा फार्मलाई कारबाही गरेको हो । उनीहरूलाई १९ लाख ८३ हजार रुपियाँ जरीवाना तिराइएको कार्यालयले जनाएको छ । 

कार्यालयले पर्सा, बारा, रौतहट सर्लाही,  मकवानपुर र चितवनमा गरी १४० ओटा व्यापारिक फार्ममा अनुगमन गरेको थियो । उनीहरूलाई उपभोक्ता संरक्षण ऐन २०७५ अनुसार कारबाही गरी जरीवाना तिराइएको कार्यालयका सूचना अधिकारी दिलीपखंग खत्वेले जानकारी दिए । 

---

त्यस्तै विदेशी ब्राण्डका नक्कली उत्पादन बनाउने वीरगञ्जको एउटा उद्योगलाई पनि जिल्ला अनुगमन टोलीले जरिवाना गरेको छ । पर्साका प्रमुख जिल्ला अधिकारी आसमान तामाङको नेतृत्वमा रहेको अनुगमन टोलीले वीरगञ्ज रेशमकोठीस्थित एसआर रेडिमेडलाई ३ लाख रुपियाँ जरिवाना तोकेको हो  ।

नर्थ फेस, एडिडास लगायतका ब्राण्डको नक्कलगरी ट्रयाकसुट बनाएको फेला पारेपछि उद्योगलाई उपभोक्ता संरक्षण ऐन अन्तर्गत जरीवाना गरिएको वाणिज्य, आपूर्ति तथा उपभोक्ता संरक्षण कार्यालय वीरगञ्जका सूचना अधिकृत दिलीप खङ्ग खत्वेले बताए । नक्कली उत्पादन बनाएर उपभोक्तालाई झुक्याएको सूचना आएपछि अनुगमन गरिएको जिल्ला प्रशासन कार्यालय पर्साले जनाएको छ ।