भूत मेला सुरु

महोत्तरी : महोत्तरी जिल्लाको प्रसिद्ध सोनामाई मन्दिरमा भूत मेला सुरु भएको छ । बडादसैंका अवसरमा लाग्ने भूतमेला शनिबारदेखि सुरु भएको हो ।  

महोत्तरीको औरही नगरपालिका ७ स्थित सोनामाई मन्दिरमा सप्तमीदेखि नवमीसम्म हजारौंको संख्यामा नेपाली तथा भारतीय महिलाहरू लड्दै पर्दै, रुदै हाँस्दै, घिस्रेर पुग्ने गर्छन् । मन्दिर परिसरमा नयाँ वस्त्र धारण गरी कपाल खोलेर नाच्ने महिलाको भीड मेलामा हुन्छ । 

---

हातमा नयाँ लाठी, सेतो चामल (अछत), धुप, अगरबतीसहित तन्त्रमन्त्र जप गर्ने महिलाको भूतमेलामा बाक्लै उपस्थिति रहेको मन्दिरका पुजारी रमेश झाले बताए। यहाँ वर्षेणी तान्त्रिक शक्ति र भूतप्रेतबाट पीडितहरूको मेला लाग्ने गर्छ । 

सबैजना मन्दिर परिसरमा रहेको आँखा, नाक, मुख भएको काठको खम्बा ‘जाइठ’ समात्दै चिच्याउँछन । भूत सवार भएका भनिएका उनीहरू त्यहाँ अचम्मको हर्कत गरिरहेका हुन्छन् ।