जनकपुरधाम उपमहानगर प्रमुखविरुध्द  मुद्दा

जनकपुरधाम :  पत्रकारलाई कुटपिट गरेको घटनामा जनकपुरधाम उपमहानगरपालिकाका प्रमुख लालकिशोर साहविरुध्द जिल्ला अदालत धनुषामा मुद्दा दर्ता गरिएको छ । उपमहानगरपालिकाको कार्यालयमै  गत वर्ष पुस २२ गते समाचार संकलनमा गएका पत्रकारहरुलाई कुटपिट गरेको विषयमा जनकपुरका ३ पत्रकारले आइतवार जिल्ला अदालत धनुषामा साहविरुध्द संयुक्त रुपमा मुद्दा दर्ता गराएका हुन् ।

नेपाल पत्रकार महासंघ धनुषाका अध्यक्ष एवं कान्तिपुर टिभीमा कार्यरत पत्रकार अनिल मिश्र, कान्तिपुर टिभीकै अर्का पत्रकार अमरकान्त ठाकुर र एपी वन टिभीका पत्रकार विकास साहले साहविरुध्द गाली बेइज्जती सम्बन्धी मुद्दा दर्ता गराएका हुन् ।

---

नगर प्रमुख साहसँगै उपमहानगरपालिकाका सवारी चालक गंगा मण्डलविरुध्द समेत मुद्दा दर्ता गराइएको मिश्रले जानकारी दिए ।

जानकी मन्दिरको फूलबारी तोडफोड सम्बन्धमा समाचारका लागि प्रतिक्रिया लिन पुगेका कान्तिपुर टिभीका पत्रकार ठाकुर, एपी वन टिभीका पत्रकार साहलगायतलाई गत पुस २२ गतेका नगरप्रमुख साहले आफ्नो कार्यकक्षमा  कुटपिट गरेका थिए ।

घटना सम्बन्धमा जानकारी लिन पुगेका नेपाल पत्रकार महासंघ धनुषाका अध्यक्ष मिश्रलाई नगरप्रमुख साह निकटले गाली गरेका थिए ।

मुद्दामा दोषी साबित भए साहलाई २ वर्षको जेल सजाय वा २० हजार रुपैया जरिवाना वा दुवै सजाय हुने कानूनी व्यवस्था  छ ।