‌धनुषाका विभिन्न स्थानमा 'मांस मदिरा' बिक्री गर्न रोक

जनकपुरधाम : मिथिला माध्यमिकी परिक्रमालाई मध्यनजर गर्दै जिल्ला प्रशासन कार्यालय धनुषाले पशुपंछी बध तथा मांस मदिरा बिक्री वितरणमा रोक लगाएको छ । धनुषाका सहायक प्रमुख जिल्ला अधिकारी दीपक कर्णले सूचना जारी गर्दै परिक्रमा डोला घुम्ने जिल्लाका विभिन्न स्थानमा रोक लगाएका हुन् ।

मिथिला माध्यमिकी, पंचायणी तथा अन्र्तगृह परिक्रमाको डोला विश्राम गर्ने प्रत्येक विश्रामस्थल तथा सोको १ किलोमिटर वरिपरीको क्षेत्रमा डोला पुग्नु भन्दा २४ घण्टा अगावैदेखि लागु हुनेगरी पशुपंछी वध तथा मांसमदिरा बिक्री वितरण एवं सेवन नगर्न सुचनामा भनिएको छ ।

---

१५ दिने मिथिला मध्यमा परिक्रमाका विश्रामस्थलहरू अन्तर्गत फागुन २९ गते शनिबार हनुमानगढी, चैत ८ गते आइतबार पर्वता, चैत ९ गते सोमबार धनुषाधाम, चैत १० गते मंगलबार सतोषर, चैत ११ गते बुधबार औरही, चैत १४ गते शनिबार जनकपुरधाममा पशुपंछी वध तथा मांसमदिरा बिक्री वितरण एवं सेवन नगर्न आग्रह गरिएको छ ।

त्यस्तै चैत १५ गते आइतबार जनकपुरधाममा श्रद्धालुहरुले अन्तरगृह परिक्रमा घुम्ने भएकाले सो दिन समेत मांसमदिरा बिक्री वितरण नगर्न जिल्ला प्रशासन कार्यालय धनुषाले अनुरोध गरेको छ ।