राजस्व ऐन, २०७५ को संशोधन प्रस्ताव पारित

काठमाडौँ- काठमाडौँ महानगरपालिकाको राजस्व ऐन, २०७५ को संशोधन प्रस्ताव पारित भएको छ । कामपामा आज भएको नगर सभा ११ औँ अधिवेशनको पाचौँँ बैठकले संशोधन प्रस्ताव पारित गरेको हो ।

त्यसैगरी सभामा आगामी आर्थिक वर्ष २०७९/०८० को विस्तृत बजेट तथा कार्यक्रम पेश भएको छ । आजको कार्यसूचीमा विनियोजन विधेयक, २०७९ सम्बन्धमा छलफल र पारित गर्ने विषय समावेश थियो । सभामा विस्तृत बजेट तथा कार्यक्रम पेश भएपछि यही असार २४ गते यसका विषयमा छलफल हुने बताइएको छ । 

---

प्रस्तावका विषयमा नगर सभा सदस्यहरु सन्तोष ढुङ्गेल, अनिलबाबु श्रेष्ठ र आशा श्रेष्ठलगायतले धारणा राखेका थिए । यही असार १७ गते सम्पन्न अधिवेशनको चौथो बैठकले संशोधनसहित आर्थिक विधेयक पारित गरिसकेको छ । 

यही असार १० गते सम्पन्न सभाको बैठकमा कामपा उपप्रमुख सुनिता डङ्गोलले आर्थिक वर्ष २०७९/०८० का लागि रु २५ अर्ब ४१ करोड ९६ लाख ९६ हजार  अनुमानित बजेट पेश गरेकी थिइन् । बैठकको अध्यक्षता कामपाका प्रमुख बालेन्द्र साहले गरेका थिए ।