उद्याेगमै अखाद्य वस्तु, अनुगमन पुग्नु पहिल्यै बन्द हुन्छन् बजारका पसल

मकवानपुर-  सामान्यतया अखाद्य पदार्थको बिक्रीवितरण भए नभएको अनुगमन बजार र पसलहरूमा गरिन्छ । तर बजार र पसलहरूमा भन्दा समस्या उत्पादन र भण्डारणको क्रममा उद्योगमै हुने गरेको पाइएकाे छ।

मकवानपुर जिल्लामा विशेष गरी चाड पर्व नजिकिँदै गर्दा प्रशासनले बजार अनुगमन गर्छ ।  उपभोक्ताको तीव्र गुनासो र दबाबमा आक्कझुक्कल खाद्य प्रविधि तथा गुण नियन्त्रण कार्यालयले अन्य निकायलाई समेत साथमा लिएर बजारको अवस्थाबारे अनुगमन गर्ने गरेको छ । तर बजारमा अनुगमनको क्रम सुरू हुनु पुर्व नै पसलका सटरहरू बन्द हुन्छन् र अनुगमन सिमित पारिन्छ । प्रशासनले अनुगमन थाल्दैछ भन्ने पूर्व जानकारी पाएरै यसरी सटरहरू बन्द हुनुमा मकवानपुरका पत्रकार सरोज पौडेल भन्छन् 'मिलेमतो नभए, अनुगमन आउँदैछ भन्ने जानकारी कसरी हुन्छ।'

---

जुन व्यापारीसँग अनुगमनको टोलीको कुरो मोल्दैन,उ कहाँ मात्रै अनुगमन गरिने गरेको भन्दै उनले शंका प्रकट गरे । अनुगमन टोलीमा सहभागी पत्रकार पौडेल भन्छन् 'एउटा पसलमा अनुगमन टोली पस्नासाथ अरू सबै बन्द भए,अनि टोली फर्क्यो ।'

बजारको अनुगमन प्रभावकारी नभएको कारण अखाद्य पदार्थको बिक्रीवितरण खुलेआम नै छ । यसैबीच जिल्ला प्रशासन कार्यालय मकवानपुरको नेतृत्वमा हेटौंडा औद्योगिक क्षेत्रभित्र सञ्चालनमा रहेका खाद्य उद्योगहरुको अनुगमन गरिएको छ । अनुगमनबाट खाद्य उद्योगहरु अवैध तरिकाबाट अखाद्य वस्तु उत्पादन गरेर बजार पठाउने कार्यमा संलग्न रहेको खुलेको छ ।

उपभोक्ता हित संरक्षण मञ्चका बासु खतिवडाले बजारका पसलमा भन्दा पनि उद्योगहरुमै ठूलो समस्या देखिएको बताए । अनुगमनबाट उद्योगहरु नै अवैध तरिकाबाट अखाद्य वस्तु उत्पादन गरिरहेको पाइएको खतिवडाले बताए ।

मानव तथा पशुपन्छी स्वास्थ्यमा प्रतिकुल असर पुर्‍याउने अखाद्य वस्तु उत्पादन गर्ने आद्योगिक क्षेत्रको दुई उद्योगलाई प्रशासनले कारबाही गरेको छ । प्रशासनले मसौरा उत्पादन गर्ने अनामिका खाद्य उद्योग शिल गरिएको छ । मानव स्वास्थ्यको ख्याल नै गरी अखाद्य वस्तु उत्पादन गरिरहेको पाइएपछि उद्योगमा शिल गरिएको मकवानपुरका सहायक प्रमुख जिल्ला अधिकारी बद्रीनाथ गैह्रेले जानकारी दिए । अनामिका उद्योग आफैंमा अवैध रहेको खुलेको छ ।

२०७६ असार मसान्तपछि उद्योगको खाद्य अनुज्ञा पत्र नै नवीकरण नभएको खुलेको हो । उद्योगमा अत्याधिक फोहोर पाइएको, खाद्य पदार्थमा संक्रमणको जोखिम देखिएको उत्पादन भएर बिग्रिएको वस्तुलाई फेरि उत्पादनमा प्रयोग गरेको पाइएकोले शिल गरिएको सहायक प्रजिअ गैह्रेले जानकारी दिए । उक्त उद्योगलाई ३ दिनभित्र कागजातसहित प्रशासनमा उपस्थित हुन निर्देशन दिइएको छ ।

मानवीय स्वास्थ्यका लागि मात्रै हैन पशुपंछिका लागि दाना लगायतका उत्पादन पनि स्वस्थकर हुनु जरूरी छ । प्रशासनले पशुपंछिका लागि दाना उत्पादन गर्ने औद्योगिक क्षेत्रको भ्याली फिड प्रालिले पनि अवैध तरिकाबाट दाना उत्पादन गर्ने गरेको फेला पारेको छ । उद्योगले दानाको उत्पादन र उपभोग्य मिति नै नखुलाई बिक्रीका लागि बजार पठाउने गरेको खुलेको हो । भ्याली फिड प्रालिबाट १ लाख १४ हजार ७ सय ५० मूल्य बराबरको ४५ बोरा दाना नष्ट गरिएको जनाइएको छ । उपभोग्य मिति सकिएको दाना नष्ट गरिएको सहायक प्रजिअ गैह्रेले बताए ।

यस उद्योगको १३ हजार केजीको ९ लाख २३ हजार मूल्य बराबरको २ सय ६० बोरा दाना बिक्री वितरणमा रोक लगाइएको । २ सय ६० बेरा दानामा उत्पादन र उपभोग्य मिति नखुलेकोले बिक्री वितरण गर्न रोक लगाइएको गैह्रले बताए । प्रशासनले उद्योगलाई तीन दिनभित्र कागजातसहित उपस्थित हुन निर्देशन दिएको छ । गैह्रेका अनुसार भ्याली फिडलाई पनि थप कारबाही हुन सक्नेछ । बिक्रीमा रोक लगाइएको दानाको सम्बन्धमा कागजात पत्र हेरेपछि निर्णय लिइने उनले बताए ।

अनुगमन टोलीले औद्योगिक क्षेत्रकै हेटौंडा दुग्ध वितरण आयोजना, खजुरीमा तथा एन्टारटिक बिस्कुट उद्योगमा अनुगमन गरेको छ । हेटौंडा दुग्ध वितरण आयोजनामा ठूलो समस्या नदेखिएको गैह्रेले जानकारी दिए । आयोजनामा सरसफाईमा कमजोरी देखिएको र पुरानो संरचना भएकाले झ्याल ढोकामा खिया लागेका कारण सरसफाई गर्न निर्देशन दिइएको उनले बताए ।

एन्टारटिक बिस्कुटमा सरसफाईमा कमजोरी दिएकोले सचेत गराइएको छ । अनुगमनमा खाद्य प्रविधि तथा गुण नियन्त्रण कार्यालयका प्रमुख डा। क्षितिज श्रेष्ठ, हेटौंडा उपमहानगरपालिका, घरेलु तथा साना उद्योग कार्यालय, उपभोक्ता हित संरक्षण मञ्चलगायतका प्रतिनिधिको सहभागिता थियो । अत्यधिक मुल्यबृद्विपछि उपभोक्ताको दबाबमा महिनौपछि प्रशासन र खाद्यले बजार तथा उद्योग अनुगमन गरेको थियो ।