तस्बिरमा हेटौंडाको फोहोर, व्यवस्थापनमा जटिल बन्‍दै

मकवानपुर- बागमती प्रदेशको राजधानी हेटौंडामा फोहोर व्यवस्थापन जटिल बन्दै आएको छ । २०७१ सालमा देशको सबैभन्दा सफा सहरको रुपमा पुरस्कृत भएर पाँच लाख रुपैयाँ पुरस्कार पाएको हेटौंडा सहर विस्तारै फोहोर बन्दै आएको छ ।

---

हाल हेटौंडाको फोहोर संकलन गरेर जम्मा गर्दै आएको फोहोर व्यवस्थापनको विकल्प नखोजिने हो भने अबको ४/५ वर्षमा हेटौंडाको फोहोर व्यवस्थापन नगरकै समस्याको रुपमा आउने निश्चित भएको छ । काठमाडौँको फोहोर व्यवस्थापनको चुनौती दिनदिनै बढ्दै आएको बेला हेटौंडाको फोहोर व्यवस्थापन गरिँदै आएको डम्पिङ साइट पनि भरिँदो छ ।

हेटौंडा-१० सिसौघारीमा हाल संकलन गर्दै आएको फोहोर दिनहुँ एस्काभेटर लगाउने गरिएको छ,तर यसको विकल्प भने खोजिएको छैन । डम्पिङ साइटको नजिकै बसोबास गर्दै आएका स्थानीयहरू फोहोरको गन्धको कारण आजित छन् ।

नगरपालिकाले गन्ध फैलन नदिनसमेत कुनै चासो नदिएको उनीहरू बताउँछन् । तत्कालीन हेटौंडा नगरपालिका र हालको हेटौंडा उपमहानगरपालिकाको फोहोरको परिमाण समेत दोब्बर छ, तर सफाई कर्मचारीको संख्या आधाभन्दा कम छ । यसले गर्दा पनि हेटौंडा बजारमै समेत फोहोर संकलनमा चुनौती सुरु भएको छ । 

संकलन भएको फोहोर व्यवस्थापनमा समेत समस्या भएको हेटौंडा उपमहानगरपालिका वातावरण महाशाखाका सफाइ निरीक्षक दिपेन्द्र राज शर्माले बताए ।

हाल हेटौंडा-१० को झण्डै २० विगाहा जग्गामा फोहोर थुपार्दै आएको छ । नगरपालिकाले फोहोरलाई उत्पादनमै वर्गिकरण गर्ने र त्यसै अनुरुप व्यवस्थापन गर्ने गरी ७ वर्ष अघि बनाएको योजना योजनामै थन्किएको छ । अहिले पनि बजारमा प्रयाप्त डस्टबिनहरू पनि छैनन्, र घरैमा समेत फोहोर वर्गिकरण गरेर संकलन गर्ने काम भएको छैन ।

नगरपालिकाले कुहिने, नकुहिने र अस्पतालबाट निस्कने सुइ जस्ता फोहोरको स्रोतमै वर्गिकरण गरेर छुट्टाछुट्टै संकलन गर्ने नीति लिएको थियो । ७ वर्ष अघि यो अभियान सुरु गरेको भन्दै डस्टबिनसमेत वितरण गरिएको थियो तर हाल कतै पनि यस्ता डस्टबिन छैनन् ।

फोहोर व्यवस्थापनको लागि वैकल्पिक डम्पिङ साइटको खोजि र बजारको फोहोर संकलनबारे नीतिगत रुपमा तयारी हुँदै गरेको हेटौंडा उपमहानगरपालिका मेयर मिना कुमारी लामा बताउँछिन् ।

'बजारको फोहोर संकलन तथा व्यवस्थापनलाई व्यवस्थित बनाउन नगरपालिकाले हामीले योजना बनाउने तयारी थालेका छौँ' उनले भनिन् 'यति समयभित्र वा यहीँ बनाउने भन्‍ने छैन, तर हामी गर्छौ ।'